Акторы-страйкоўцы Гарадзенскага драмтэатра знайшлі новую сцэну
1- 16.03.2021, 17:09
- 2,188
Cпектаклі з удзелам артыстаў будуць прадэманстраваныя гледачам у розных краінах Еўразвязу.
Дзесяць актораў, звольненых з Гарадзенскага драмтэатра, пераехалі ў Літву. Пра гэта «Народнай Волі» паведаміў былы рэжысёр тэатра Сяргей Курыленка.
З ягоных слоў, акторы ўжо прайшлі ў Вільні дзесяцідзённы карантын і цяпер абмяркоўваюць свой удзел у міжнародных праектах. Апошнія былі створаныя спецыяльна для творчых людзей, якія пацярпелі ад падзей у Беларусі.
Цяпер ідзе абмеркаванне будучыні рэпертуару. Плануецца, што спектаклі з удзелам гарадзенскіх артыстаў будуць прадэманстраваныя гледачам у розных краінах Еўразвязу.
У канцы верасня 2020 года з Гарадзенскага драмтэатра быў звольнены вядучы актор сцэны Ігар Уланаў. Ён абвясціў гледачам пра тое, што артысты прыпыняюць спектакль праз тое, што на акцыі пратэсту, якая прайшла ў Гародні 20 верасня, былі затрыманыя іх калегі - заслужаны артыст Беларусі Сяргей Курыленка і ягоная жонка актрыса Валянціна Харытонава.
Пазней была звольненая «па пагадненні бакоў» акторка Лізавета Мілінцэвіч.
27 кастрычнік два рэжысёры тэатра - галоўны рэжысёр Генадзь Мушперт і рэжысёр-пастаноўшчык, заслужаны артыст РБ Сяргей Курыленка - далучыліся да страйку. Дырэктар прапанаваў двум рэжысёрам напісаць заяву аб звальненні на ўласнае жаданне, але яны адмовіліся. А пазней стала вядома, што рэжысёраў звольнілі.
Пасля гэтага да страйку далучыліся акторы тэатра, якія заявілі, што падзяляюць грамадзянскую пазіцыю звольненых рэжысёраў. 30 кастрычніка шасцёра актораў былі звольненыя з тэатра.