Як над актывісткай з Гомеля праходзяць «сакрэтныя» суды

Гісторыя Настассі Перавошчыкавай.

У студзені 2020 года прайшлі масавыя ператрусы ў жыхароў Навабеліцы ў Гомелі. Міліцыя шукала раённыя сцягі. Ператрусы прайшлі ў Настассі Перавошчыкавай і ў яе дзядулі ветэрана. 22 студзеня дзяўчына была затрыманая і арыштаваная на 15 дзён, як мяркуецца за фота з плакатам «Вярнуў Кандрусевіча? Вярні выбары!». 6 лютага Насту вызвалілі, але 8 лютага яе зноў выклікалі ў міліцыю і далі 15 дзён арышту. Пазней над ёй прайшлі яшчэ некалькі судоў. Усяго дзяўчына атрымала больш за 75 дзён арышту.

Яе 89-гадовы дзядуля ветэран, узнагароджаны медалём «За доблесную працу ў Вялікай Айчыннай вайне», назваў цяперашнія падзеі фашызмам.

Алена - маці Насты Перавошчыкавай паведаміла flagstok.info, што 24 лютага прайшоў чарговы суд над яе дачкой.

- Як звычайна, у абстаноўцы строгай сакрэтнасці. Адвакату патэлефанавалі за некалькі хвілін да пачатку пасяджэння і яна не паспела даехаць. А само пасяджэнне было прызначанае незадоўга да канца «працоўнага дня». Я ўзяла таксоўку і панеслася туды, каб калі хоць не на працэс патрапіць, то хоць бы для таго, каб даведацца пра вынік і, галоўнае, убачыць дачку. Не паспела.

Вахцёр мне сказала, што «суд» скончаны і падсудную адвялі ў міліцыю. Але яна мяне крыху абнадзеіла, сказаўшы, што адзін з міліцыянтаў застаўся чакаць копію пратаколу. Я таксама стала чакаць. Дачакаўшыся, я спытала. На што быў адказ, што Перавошчыкавай у судзе не было. Мяне ўзялі сумневы і я патэлефанавала ў ІЧУ. Мне адказалі, што яе забралі ў РАУС. Гэта значыць, праваахоўнікі настолькі баяцца агалоскі, так хочуць схаваць свае бесстароннія справы, што робяць усё, каб не пусціць ні адваката, ні сваякоў, ні іншых прысутных на наш «адкрыты і справядлівы суд», - распавядае Алена.

Яна паведамляе, што атрымала ад Насты тры лісты. Адзін напісаны на чвэртачцы ліста і два іншыя - на паловах. І гэта пры тым, што маці перадала ёй стос паперы А4 і сшытак. Таксама Алена дзякуе ўсім, «хто ўсяляк імкнецца нам дапамагчы, перажыць гэтую чорную паласу ў жыцці».

Настассі можна напісаць ліст.

Анастасія Андрэеўна Перавошчыкава,

Ізалятар часовага ўтрымання (ІЧУ), вул. Міжгародняя, 26, Гомель (індэкс 246144).