Як і колькі падаткаў будуць плаціць ІП у 2022-м?

Цэлы шэраг змен у падаткаабкладанні стартуе ўжо налета.

Адмова ад спрошчанай падатковай сістэмы для малога бізнэсу (ІП), а таксама цэлы шэраг змен у падаткаабкладанні стартуе ўжо налета. Як расказаў у інтэрв'ю тэлеканалу «Беларусь 1» намеснік кіраўніка адміністрацыі кіраўніка Дзмітрый Круты, гэта звязанае з тым, што малы бізнэс «усё менш удзельнічае ў дзяржвыдатках». Myfin.by сабраў найважнейшыя моманты з інтэрв'ю: хто, колькі і калі павінен будзе плаціць падаткаў у новым годзе.

Як патлумачыў Дзмітрый Круты, апошнія тэндэнцыі ў частцы збірання падаткаў з малога бізнэсу негатыўныя. У якасці прыкладу ён прывёў наступныя разлікі:

- Агулам адзін заняты на мікрапрадпрыемстве плаціць 7500 рублёў падаткаў, індывідуальны прадпрымальнік са звычайнай сістэмай падаткаабкладання - такіх, на жаль, меншасць - плаціць 11 000 рублёў, ІП са «спрошчанай сістэмай падаткаабкладання» плаціць усяго толькі 1900 рублёў, прадпрымальнік з адзіным падаткам плаціць 1700 рублёў. Калі ІП дазволілі пераходзіць са «спрошчанай сістэмы падаткаабкладання» на адзіны падатак, агульная сума падатковых паступленняў у 2019 зменшылася на 40%. У 2020 годзе яна скарацілася яшчэ на 30%. Вядома, такая сума страт не магла застацца без увагі. У нас салідарная пенсійная сістэма, і малы бізнэс павінен удзельнічаць у фінансаванні гэтых выдаткаў.

У частцы падаткаў нас чакае падвышэнне ставак адзінага падатку. Гэтая тэма аддадзеная на водкуп мясцовым уладам. Людзі, занятыя ў малым бізнэсе, зыходзячы з попыту, эканамічнай сітуацыі ў рэгіёнах, могуць плаціць розныя сумы падаткаў, таму пэўная дыферэнцыяцыя патрэбная. Для ІП у асобных тыпах дзейнасці спрошчаная сістэма налета яшчэ застанецца, для астатніх тыпаў бізнэсу яна будзе скасаваная, вырастуць стаўкі адзінага падатку.

Але з 2023 года чакаецца, што ўсе яны пяройдуць на адзіную форму падаткаабкладання: выплату падаходнага падатку з падвышанай стаўкай 18 адсоткаў з розніцы паміж даходамі і выдаткамі.

Для самазанятых з 2023-га года ўводзіцца падатак на прафесійны прыбытак, як у краінах-суседзях па ЕАЭС: 10% ад прыбытку пры працы з фізічнымі асобамі, 10% ад прыбытку пры працы з юрыдычнымі асобамі, але да вызначанай сумы, і 20% ад прыбытку звыш гэтай сумы.