У Гомелі ды вобласці ідзе хваля звальненняў - нафтавікі, лекары, настаўнікі
30- 6.12.2021, 15:10
- 42,516
Хто на чарзе?
Апошнія тыдні сетка перапоўненая паведамленнямі аб масавых звальненнях работнікаў дзяржпрадпрыемстваў. У рэдакцыю «Флагштока» таксама паступае інфармацыя аб звальненнях у сферах адукацыі, культуры, медыцыны. Спісы на звальненні спускаюцца не толькі ў вялікія гарады, але і ў малыя населеныя пункты, дзе папросту няма замены для звольненых кадраў. Сабралі інфармацыю пра вядомыя на сёння самыя масавыя звальненні.
Аб спісах на звальненне медработнікаў рэгулярна паведамляюць «Белыя халаты». 6 снежня стала вядома, што адміністрацыя Мазырскай цэнтральнай раённай лякарні з пачатку года звольніць 23 супрацоўнікі. Паведамляецца аб звальненні медработнікаў, лекараў, у тым ліку загадчыка аддзялення траўматалогіі. Раней у Мазырскай лякарні праводзіліся анкалагічныя аперацыі, цяпер, нягледзячы на наяўнасць абсталявання, апераваць такіх пацыентаў няма каму, іх накіроўваюць на лячэнне ў Гомель. Таксама паведамляецца, што звальненні праводзяць не з ініцыятывы кіраўніцтва лякарні - спісы на звальненне спускаюць зверху.
У тг-канале «БДМ» паведамляецца аб звальненнях гомельскіх судмедэкспэртаў - людзей прымушаюць пісаць заявы аб сыходзе на ўласнае жаданне.
Пра такія ж спісы паведамляюць і работнікі «Беларуснафты». Як паведаміла давераная крыніца, у іх больш за 50 чалавек па ўсім вытворчаму аб'яднанні - падраздзяленнях у Гомелі, Рэчыцы, Светлагорску. Усіх патрабуюць звольніцца на ўласнае жаданне.
«Прычына невядомая. Яе не абвяшчалі. Ціснулі і адразу пасля выбараў, і потым цягам паўтара года. Хутчэй, проста звальняюць непажаданых».
Як раней паведамляла са спасылкай на чытачоў «Радыё Свабода», «чысткі» адбываюцца ў Гомельскім абласным цэнтры гігіены, эпідэміялогіі і грамадскага здароўя, у «Гомельэнэрга» і раённым філіяле прадпрыемства.
З чым жа звязаныя звальненні? Чытачы, якія трапілі ў «спісы нядобранадзейных», у большасці мяркуюць, што звальняюць усіх, хто хоць неяк праявіў нелаяльнасць да дзейнага рэжыму або свайго кіраўніцтва.
«Выказаўся недзе не так, паставіў подпіс падчас прэзідэнцкай кампаніі за апазіцыйнага кандыдата. Я ўжо не кажу, калі недзе трапіўся на пратэстах, засвяціўся ў каментарах у інтэрнэце — такіх найперш яшчэ да масавых звальненняў прыбралі. Нават тых, хто меў сваё меркаванне да ўсіх гэтых падзей, могуць западозрыць у нелаяльнасці», - выказвае меркаванне гамяльчук, які трапіў у спіс на звальненне.e