Памёр беларускі археолаг Аляксандр Ягарэйчанка

Аўтарытэтны беларускі археолаг памёр на 67-м годзе жыцця.

Аўтарытэтны беларускі археолаг Аляксандр Ягарэйчанка памёр сёння, 2 снежня, на 67-м годзе жыцця. Пра гэта Zerkalo.io паведамілі яго калегі.

Аляксандр Ягарэйчанка нарадзіўся ў 1955 годзе ў Сумскай вобласці Украіны. Скончыў гістарычны факультэт БДУ (1977) і аспірантуру Інстытута археалогіі Акадэміі навук СССР (1980).

Ягарэйчанка - доктар гістарычных навук, чыя дысертацыя прысвечаная культурам штрыхаванай керамікі. «Яму ўдалося давесці, што культура штрыхаванай керамікі распадаецца на дзве самастойныя культуры: культуру ранняй штрыхаванай керамікі, якая існавала ў апошняй чвэрці ІІ – І тысячагоддзі да н. э. і была характэрна для эпохі бронзы, і культуру позняй штрыхаванай керамікі, якая належыць да класічнага жалезнага веку ў рамках мяжы новай эры - першай паловы І тысячагоддзя н. э. Сваім даследаваннем навуковец удакладніў храналогію гісторыі жыцця нашых продкаў і праліў святло на існаванне некаторых невядомых старажытных культур», - пісаў часопіс «Беларуская думка».

Працаваў навуковым супрацоўнікам аддзела археалогіі першабытнага таварыства Інстытута гісторыі АН Беларусі. З 1988 года - на гістарычным факультэце БДУ. Доўгія гады з'яўляўся загадчыкам кафедры археалогіі і спецыяльных гістарычных дысцыплін

Ягарэйчанка даследаваў эпоху позняй бронзы і жалезнага веку на тэрыторыі Беларусі і сумежных рэгіёнаў. Аўтар дзвюх манаграфій, двух раздзелаў у другім томе «Археалогіі Беларусі», звыш 100 навуковых і энцыклапедычных артыкулаў.