Прэзідэнта Чэхіі выпісалі з лякарні, куды ён патрапіў з каранавірусам

Зэман плануе прызначыць новага прэм'ера.

Прэзідэнта Чэхіі Мілаша Зэмана выпісалі з Цэнтральнага вайсковага шпіталя ў Празе, куды ён быў дастаўлены ў чацвер увечары, 25 лістапада, праз станоўчы тэст на каранавірус. Пра гэта паведамляе nv.ua са спасылкай на Ceske Noviny.

Зэман праляжаў у бальніцы без сімптомаў хваробы дзве ночы.

Адзначаецца, што са шпіталя прэзідэнт Чэхіі адправіцца ў Ланскі замак, дзе ў нядзелю ён плануе прызначыць Пятра Фіялу новым прэм'ер-міністрам.

Удзень 25 лістапада 77-гадовы прэзідэнт Чэхіі Мілаш Зэман быў выпісаны з бальніцы, куды яго шпіталізавалі больш за месяц таму. Праз некалькі гадзін Зэмана зноў шпіталізавалі праз станоўчы тэст на каранавірус.

10 кастрычніка прэзідэнта Чэхіі Мілаша Зэмана даставілі ў бальніцу неўзабаве пасля размовы з прэм'ер-міністрам краіны Андрэем Бабішам, партыя якога напярэдадні саступіла парламенцкія выбары. 77-гадовы Зэман патрапіў у аддзяленне інтэнсіўнай тэрапіі.

18 кастрычніка кіраўнік верхняй палаты парламента Чэхіі Мілаш Вістрчыл заявіў, што Зэман паводле стана здароўя не здольны выконваць абавязкі прэзідэнта. На наступны дзень камітэт Сената канстытуцыі і парламенцкіх працэдур пагадзіўся з неабходнасцю пазбавіць паўнамоцтваў прэзідэнта Зэмана.

Лекары заявілі, што ў прэзідэнта ёсць цыроз печані, які поўнасцю вылечыць нельга.

Таксама Зэман пакутуе на нейрапатыю ніжніх канечнасцяў, праз што сёлета пачаў перасоўвацца ў інвалідным вазку. Ён казаў, што стаў горш чуць і скардзіўся на нізкі артэрыяльны ціск. Зэман доўгі час лячыўся ад дыябету. Летась прэзідэнт Чэхіі насіў артэз пасля таго, як упаў і зламаў руку.