Спробы прарыву польскай мяжы: Як рэагуе Жалезная дывізія

Вайскоўцы працуюць на некалькіх аператыўных лініях.

"Мы адзначаем спробы прарыву мігрантамі польска-беларускай мяжы ў Люблінскім ваяводстве", – сказаў прэс-сакратар 18-й механізаванай дывізіі маёр Пшэмыслаў Ліпчынскі. Ён запэўніў, што мяжа бяспечная і герметычная, паведамляе TVP.

Ужо амаль два месяцы польская 18-я механізаваная дывізія імя генерала арміі Тадэвуша Бука падтрымлівае дзеянні Прыбужанскага памежнага атрада на польска-беларускай мяжы ў Люблінскім ваяводстве. Гаворка ідзе пра 180-кіламетровы адрэзак мяжы, які ў асноўным уяўляе з сябе раку Буг.

«Гэта для нас немалая палёгка ў ахове мяжы, таму што рака ўяўляе з сябе цяжкадаступную для перасячэння мясцовасці перашкоду. Акрамя таго, Буг – вельмі небяспечная рака, якая мае падвойнае дно, віры», – адзначыў маёр Ліпчынскі.

Адказваючы на пытанне пра колькасць вайскоўцаў, якія ўдзельнічалі ў ахове польска-беларускай мяжы на Любліншчыне, ён адзначыў, што гэта дастатковыя сілы.

«У нас ёсць тылавыя войскі – столькі, колькі цяпер неабходна для выканання гэтай задачы. У любы момант мы гатовыя павялічыць колькасць войскаў, калі ўзнікне такая неабходнасць», – адказаў ён.

Паводле ягоных словаў, вайскоўцы працуюць на некалькіх так званых аператыўных лініях. Першая знаходзіцца ў раёне польска-беларускай мяжы ля Буга, дзе жаўнеры працуюць з памежнікамі, каб не дапусціць незаконнага перасячэння мяжы. Наступныя аперацыйныя лініі знаходзяцца ў глыбіні зоны надзвычайнага становішча.

«Там знаходзяцца нашыя так званыя Сілы хуткага рэагавання, якія знаходзяцца ў сталай гатоўнасці падтрымаць, калі адбудзецца спроба масавага незаконнага прарыву мяжы. Сілы хуткага рэагавання таксама неабходныя на выпадак перасячэння мяжы ў некалькіх месцах адначасова», – дадаў прадстаўнік 18-й механізаванай дывізіі.

Салдаты назіраюць за польска-беларускай мяжой з сушы, вады і паветра. Для кантролю за выкананнем недатыкальнасці мяжы дывізія выкарыстоўвае ў тым ліку пласкадонныя чаўны і беспілотныя лётныя апараты з цеплавізарамі. Для начнога назірання падчас пешых і матарызаваных патрулёў выкарыстоўваюцца цеплавізары і прыборы начнога бачання.

«Ёсць месцы, дзе мы таксама ўсталявалі інжынерную плаціну з калючага дроту. У асноўным на рацэ Буг, дзе ёсць брады або месцы ўпадзення прытокаў у раку, дзе можна было б перасячы мяжу плыўма. У цяперашні час няма неабходнасці расстаўляць плаціну на ўсю даўжыню мяжы ў Люблінскім ваяводстве, бо рака Буг з'яўляецца натуральным бар'ерам», – расказаў маёр Пшэмыслаў Ліпчынскі.

Як ён дадаў, сталыя пасты таксама размешчаныя на ўсіх чыгуначных і аўтамабільных мастах на рацэ Буг.

Прадстаўнік 18-й дывізіі таксама паведаміў, што ў Люблінскім ваяводстве былі незаконныя перасячэнні мяжы, напрыклад спробы пераплысці раку плыўма або на пантонах. У кастрычніку патануў 19-гадовы сірыец, які хацеў перабрацца з Беларусі ў Польшчу цераз Буг.