БЧБ-сцяг, узняты падчас ЧС у Рызе, прададзены на аўкцыёне за 12 600 даляраў
3- 28.10.2021, 20:02
- 2,568
Сцяг быў узняты ў траўні мэрам Рыгі і кіраўніком МЗС Латвіі.
БЧБ-сцяг, які падчас ЧС паднялі і паставілі ў адзін шэраг са сцягамі ўсіх краін-удзельніц мэр Рыгі Марціньш Стакіс і кіраўнік МЗС Латвіі Эдгар Рынкевіч, прададзены на аўкцыёне за 12600 даляраў, паведамляе «Трыбуна».
Усяго была зроблена 41 стаўка.
Нагадаем, што 24 траўня Стакіс разам з Рынкевічам замянілі чырвона-зялёны сцяг Беларусі на БЧБ-палатно з «Пагоняй». Дзеянні латвійскіх чыноўнікаў адбыліся на наступны дзень пасля пасадкі ў Менску самалёта, які выконваў рэйс па маршруце Афіны - Вільня.
Стакіс падарыў гэты БЧБ-сцяг з памятным подпісам, каб яго выставілі на аўкцыён і дапамаглі рэпрэсаваным людзям, якія маюць патрэбу ў фінансавай падтрымцы.
Усе сродкі, атрыманыя па гэтым артыкуле, будуць пералічаны ў Беларускі фонд спартыўнай салідарнасці.
Адзначым, што беларуская Генпракуратура распачала на Стакіса і Рынкевіча крымінальную справу за распальванне нацыянальнай варожасці пасля зняцця «захаду сонца над балотам» у Рызе.