Прэзідэнт ПАРЭ выступіў з заявай аб сітуацыі ў Беларусі.

Рык Дамс шакаваны дзеяннямі рэжыму.

Прэзідэнт Парламенцкай асамблеі Рады Еўропы Рык Дамс «рашуча асудзіў» рэпрэсіі супраць грамадзянскай супольнасці і праваабаронцаў у Беларусі. Як паведамляе прэс-служба ПАРЕ, Дамс заклікаў беларускія ўлады «ў поўнай меры паважаць правы на свабоду асацыяцый, сходаў і выказвання меркаванняў, а таксама ўсе іншыя правы чалавека, гарантаваныя Міжнародным пактам аб грамадзянскіх і палітычных правах, удзельнікам якога з'яўляецца Беларусь».

«У апошнія тыдні сітуацыя з захаваннем асноўных правоў чалавека ў Беларусі стала ўсё больш турбаваць мяне, а таксама, у шырэйшым кантэксце, Парламенцкую асамблею Рады Еўропы, - адзначыў ён. - Працяглыя і зусім неабгрунтаваныя турэмныя тэрміны для двух лідараў апазіцыі - Марыі Калеснікавай, лаўрэата прэміі ПАРЕ імя Вацлава Гаўла сёлета, і Максіма Знака - шакавалі большасць людзей у Еўропе», паведамляе БелаПАН.

Дамс падкрэсліў, што судовыя прысуды Калеснікавай і Знаку з'яўляюцца «не адзіным прыкладам палітычнага пераследу ў Беларусі». «Прынамсі 30 праваабаронцаў, некаторыя з якіх супрацоўнічалі з Радай Еўропы, застаюцца ў папярэднім зняволенні, некаторыя падвяргаюцца крымінальнаму пераследу або іншым формам пераследу. Некаторыя знаходзяцца ў выгнанні», - адзначыў ён.

Са слоў Дамса, асабліва ён занепакоены тым, што пад вартай працягваюць заставацца сем сябраў праваабарончай арганізацыі «Вясна», якая займаецца дакументаваннем парушэнняў правоў чалавека, учыненых беларускімі ўладамі пасля прэзідэнцкіх выбараў у жніўні 2020 года.

«Сярод гэтых сямі чалавек — тры лідары «Вясны», у тым ліку Алесь Бяляцкі, яшчэ аднаго лаўрэата прэміі імя Вацлава Гаўла. Яны і многія іншыя па праве лічацца палітычнымі зняволенымі», - сказаў Дамс.

Ён таксама зазначыў, што з ліпеня ў Беларусі ліквідуюцца няўрадавыя арганізацыі, у тым ліку тыя, якія працавалі ў сферы абароны правоў чалавека, уключаючы Беларускі Хельсінкскі камітэт, «Прававую ініцыятыву» і «Звяно».