Італійскія навукоўцы: Вакцынацыя пасля перанесенага каранавіруса дае супэрімунітэт

Перахварэўшы на COVID-19, адназначна варта вакцынавацца.

Мяшаны імунітэт, які з'яўляецца пасля вакцынацыі ўжо перахварэлых на каранавірус, больш эфектыўна дае рады новым штамам.

Да такой высновы прыйшлі навукоўцы ўніверсітэцкага шпіталя Сены ў Італіі, піша Nature (пераклад - zn.ua).

Навукоўцы прааналізавалі ўзровень У-каморак памяці ў людзей, якія былі вакцынаваныя пасля таго, як перахварэлі на COVID-19, а таксама якія зрабілі прышчэпку, але не хварэлі. У першых працэнт нейтралізавальных монакланальных антыцелаў быў вышэйшы, чым у тых, хто не хварэў, для кожнага з вядомых штамаў.

Гэта звязана з зародкавай лініяй IGHV2-5 і лініяй IGHJ4-1, якую выявілі толькі ў перахварэлых людзей, і якая выпрацоўвала магутныя і шырока нейтралізавальныя антыцелы.

У іншым даследаванні гаворыцца, што вакцынацыя пасля хваробы выклікае "супэрімунітэт" (мяшаны або гібрыдны імунітэт), які здольны забяспечыць надзейную абарону.

Як інфармуе ўкраінская лекарка-інфекцыяністка Леся Радкоўская, вакцынавацца пасля перанесенага каранавіруса можна адразу, калі скончыцца заразны перыяд.

"Гэта значыць, калі закончыцца тэрмін самаізаляцыі ды сімптомы захворвання, а чалавек атрымае адмоўны тэст на PCR/антыген", - адзначыла яна.

Пры патрэбе можна адкласці прышчэпку на тэрмін да шасці месяцаў - менавіта столькі часу мае чалавек, каб не захварэць на каранавірус паўторна.

Нягледзячы на тое, перахварэў чалавек або не, усё адно ёсць паспяховы досвед і рэкамендацыя правесці вакцынацыю пасля шасці месяцаў па заканчэнні хваробы.

Вакцынавацца пасля каранавіруса трэба ўсім, бо чым большы адсотак вакцынаваных, тым больш дзейсны калектыўны імунітэт.

Пасля перанесенага захворвання выпрацоўваецца набыты прыродны імунітэт, але ён не гарантуе таго, што чалавек ізноў не захварэе на каранавірус. І цяжар новага захворвання не залежыць ад папярэдняга досведу хваробы.

Імунітэт, які развіваецца пасля вакцынацыі, дасць надзейную абарону ад каранавіруса. Вакцынаваныя людзі радзей хварэюць на COVID-19. А калі такое здараецца, то пераносяць хваробу значна лягчэй і з меншай колькасцю ускладненняў.

Гэта адбываецца таму, што вакцыны лепш стымулююць утварэнне антыцелаў і Т-каморак, якія абясшкоджваюць вірус.