Чатыры факты паказваюць на тое, што стасункі Пуціна і Лукашэнкі – на мяжы
25- 23.10.2021, 18:20
- 54,848
Паміж Масквой і Менскам зноў «заіскрылася».
Улады Беларусі і Расеі робяць выгляд, што ўсё ў парадку, але розныя сігналы пераконваюць у адваротным, піша «Салідарнасць».
Успомнім падзеі апошняга месяца – яны выглядаюць намёкамі на тое, што стасункі Аляксандра Лукашэнкі і Уладзіміра Пуціна пагаршаюцца.
1. У Беларусі адпраўлены за краты журналіст «Комсомольской правды» Генадзь Мажэйка. Прэс-сакратару прэзідэнта РФ Дзмітрыю Пяскову давялося каментаваць гэтую падзею, а пасля заклікаў расейскіх журналістаў абараніць калегу Крэмль, які не змог нічога зрабіць, выглядае не ў найлепшым святле.
Больш за тое, прадстаўніцтва «Комсомольской правды» ў Беларусі змушанае было зачыніцца.
2. Нягледзячы на анонс Лукашэнкі, Пуцін так і не прыляцеў у Менск на саміт лідараў краінаў СНД і ЕАЭС. Калегі ўзялі з яго прыклад, у выніку саміты праводзіліся ў онлайн-фармаце.
Між тым гэтыя мерапрыемствы павінны былі стаць трыумфам кіраўніка Беларусі і засведчыць ягоную легітымнасць. Але не сталі.
3. Прадстаўнік Расеі Сяргей Лаўроў прыехаў у Менск на пасяджэнне рады міністраў замежных справаў СНД, але стасункаў з Лукашэнкам у яго не здарылася. Хоць раней палітыкі кожны раз выкарыстоўвалі магчымасць сустрэцца асабіста.
4. Выданне "Камерсант" паведамляе, што пакет з 28 саюзных праграмаў для паглыблення эканамічнай інтэграцыі Пуцін і Лукашэнка на пасяджэнні Вышэйшай дзяржрады Саюзнай дзяржавы 4 лістапада могуць і не падпісаць.
Хоць улады дзвюх краінаў анансавалі гэта крок, а Пуцін заявіў, што пра ўсё здолелі дамовіцца, перад выбарамі ў Дзярждуму.
Нельга выключаць, што Менск і Масква не могуць дамовіцца наконт прынцыповага пытання – адзінага рынку энэрганосьбітаў.