Супраціўнікі хунты ў М'янме дамагліся вызвалення тысяч палітвязняў

Ціск на вайсковы рэжым працягваецца.

Вайсковая хунта ў М'янме абвясціла аб вызваленні з-за кратаў больш як 5,6 тысячы супраціўнікаў рэжыму. Пра гэта паведаміла дзяржаўная тэлевізія ў панядзелак, 18 кастрычніка. Пры гэтым улады абвінавацілі апазіцыянераў у распальванні беспарадкаў у краіне. Са слоў лідара хунты Мін Аун Хлайна, амністыя была абвешчаная "з гуманітарных меркаванняў". Першыя зняволеныя пачалі пакідаць турмы, паведамляе "Нямецкая хваля".

Вызваленне вязняў адбылося праз дзень пасля таго, як Асацыяцыя дзяржаў Паўднёва-Усходняй Азіі (АСЕАН) прыняла пастанову выключыць прадстаўнікоў хунты са спісаў удзельнікаў саміта арганізацыі. Мерапрыемства пройдзе з 26 да 28 кастрычніка. Замест чальца вайсковага ўрада і падпольнага Урада нацыянальнага адзінства (NUG), які супрацьстаіць яму, у саміце возьме ўдзел прадстаўнік М'янмы, які не знаходзіцца ні ў адной з груповак. Такім чынам, АСЕАН падкрэслівае нейтральнасць да ўнутрыпалітычнага канфлікту. Арганізацыя абгрунтавала сваю пастанову тым, што хунта не выканала выпрацаваны ў красавіку план нацыянальнага замірэння ў краіне.

Вайсковы пераварот у краіне адбыўся ў лютым 2021 года. Дзейны ўрад быў разагнаны, прэзідэнт краіны Він Мнін - арыштаваны. Супраціўнікі хунты сышлі ў падполле і пачалі барацьбу з антыдэмакратычным рэжымам, арганізаваўшы NUG. 7 верасня ўрад у падполле заклікаў насельніцтва М'янмы да агульнанацыянальнага паўстання.