Аўтобусных кантралёраў з Менска і Менскай вобласці злавілі на махінацыях са штрафамі

Выплаты афармлялі на старонніх людзей, якія не здагадваліся аб тым, што адбываецца.

Крымінальныя справы за злоўжыванне службовымі паўнамоцтвамі былі заведзеныя на трох кантралёраў, якія працавалі на тэрыторыі Менска і Менскага раёна. Службовыя асобы абвінавачваюцца ў тым, што бралі штрафы з безбілетнікаў, не складаючы пратаколы. Альбо афармлялі іх на старонніх людзей, якія не здагадваліся аб тым, што адбываецца. Аб заканчэнні расследавання паведамляе СК.

Фігурантамі сталі трое работнікаў транспартнай арганізацыі, гаворка ідзе пра падзеі 2020 і 2021 гадоў. Сэнс гэтых дзеянняў следства тлумачыць так: кантралёры атрымлівалі ад парушальнікаў грошы, пасля чаго ў некаторых выпадках праз адсутнасць дакументаў у безбілетнікаў адпускалі іх. Фармальна ж у такіх выпадках неабходна даставіць парушальніка ў міліцыю для высвятлення асобы. Пры гэтым, адзначае СК, пастановы аб адміністрацыйным спагнанні складалі на іншых безбілетнікаў, якіх лавілі раней. Копія пастановы, як правіла, на рукі грамадзянам не выдавалася.

Таксама, з інфармацыі Следчага камітэта, былі выпадкі, калі кантралёры атрымлівалі ад пасажыраў грошы і не выносілі пастановы аб адміністрацыйным спагнанні.

Пацярпелымі прызнаныя дзевяць чалавек.

Абвінавачаныя - мужчына 57 гадоў, 46- і 51-гадовая жанчыны. Судзімасцяў не маюць, на працы і дома ім далі добрыя характарыстыкі. Кантралёры не пад вартай, усіх адпусцілі пад асабістае паручыцельства. Прымененая ч. 2 арт. 424 КК (злоўжыванне службовымі паўнамоцтвамі).

Матэрыялы справы перададзеныя пракурору для накіравання ў суд.