Афёра года: што чакае беларускіх кіроўцаў паводле новага адміністрацыйнага кодэкса?

Змяненняў сапраўды шмат.

Як вынікае з вуснаў чыноўнікаў, Кодэкс аб адміністрацыйных правапарушэннях значна «лібералізаваны», піша «Автобизнес».

Ці так гэта напраўду і чаго чакаць аўтаўладальнікам?

Пачнём з тых артыкулаў і пакаранняў, якія былі асабліва папулярныя летась. Што тут змянілася?

Кіроўцам выдзелілі новы пункт КоАП

Раней арт.18.1 складаўся з адной часткі, яе санкцыя прадугледжвала штраф ад 6 да 10 базавых велічынь. Планавалася пакінуць такое пакаранне і ў праекце кодэкса, але ў выніковай версіі санкцыі значна больш жорсткія - за стварэнне перашкод на транспартных камунікацыях можна атрымаць штраф ад 6 да 50 базавых. Пры гэтым для кіроўцаў выдзелілі асобны пункт. Цытуем:

2. Наўмыснае блакаванне транспартных камунікацый асобай, якая кіравала транспартным сродкам, у месцы правядзення масавага мерапрыемства або пацягнула стварэнне аварыйнай абстаноўкі - цягне накладанне штрафу сумаю ад шасці да пяцідзесяці базавых велічынь з пазбаўленнем права займацца пэўнай дзейнасцю тэрмінам ад аднаго года да двух гадоў або без пазбаўлення.

Зараз афіцыйна: Пасігналіў - страціў пасведчанне

Арт.18.13 сур'ёзна змяніўся, і не апошнюю ролю ў гэтым адыгралі паслявыбарныя падзеі. Нагадаем, што ДАІ летам раптам «вынайшла» пакаранне для кіроўцаў, што сігналяць у падтрымку пратэстоўцаў, - нібыта гэта стварэнне аварыйнай абстаноўкі, за што маглі пазбавіць пасведчання. Чаму гэта было неправамерна, мы ўжо тлумачылі.

Цяпер за парушэнне правілаў карыстання гукавымі сігналамі (ч.3 арт.18.13) прадугледжваецца штраф да 3 базавых велічынь. А для кіроўцаў, якія падаюць гукавы сігнал у «пэўных» месцах, уведзеная асобная норма. Яна вартая таго, каб яе працытаваць:

4. Парушэнне асобай, якая кіруе транспартным сродкам, правілаў карыстання гукавымі сігналамі ў месцы правядзення масавага мерапрыемства - цягне накладанне штрафу сумаю да дзесяці базавых велічынь з пазбаўленнем права займацца пэўнай дзейнасцю тэрмінам да аднаго года або без пазбаўлення.

Такім чынам «ноу-хау» ДАІ зараз афіцыйна прапісанае ў КоАП. Аднак насцярожвае тэрмін «у месцы правядзення масавага мерапрыемства» (самыя ўважлівыя, дарэчы, маглі заўважыць яго і ў пункце пра блакаванне дарог). Непасрэдна КоАП не дае трактоўкі, што гэта за месца і як яго вызначыць звычайнаму чалавеку. Улічваючы, што пратэстныя акцыі праходзяць практычна ў любым месцы горада, «патрапіць» можна на раз.

Цікавы момант: а калі масавае мерапрыемства дазволена ўладамі, то таксама, атрымліваецца, сігналіць нельга? Напрыклад, калі пасігналіць удзельнікам афіцыйнага шэсця, прысвечанага Дню Перамогі, пасведчання таксама пазбавяць? Бо арт.18.13 КоАП у яго цяперашнім выглядзе не падзяляе масавыя мерапрыемствы на дазволеныя і недазволеныя.

Закон РБ Аб масавых мерапрыемствах у Рэспубліцы Беларусь

масавае мерапрыемства - сход, мітынг, вулічнае шэсце, дэманстрацыя, пікетаванне і іншае масавае мерапрыемства;

iншае масавае мерапрыемства - спартыўна-масавае, культурна-відовішчнае, іншае відовішчнае або культурнае рэспубліканскае мерапрыемства, рэлігійнае мерапрыемства, што праводзяцца ў спецыяльна не прызначаных для гэтай мэты месцах пад адкрытым небам або ў памяшканнi;

Перавысіў паўторна, але не моцна - застанешся з пасведчаннем кіроўцы

«Расцэнкі» пры сустрэчы з інспектарам ДАІ на дарозе пры перавышэнні хуткасці з гэтага часу такія (арт.18.12):

ч.1: ад 10 да 20 км/г - штраф да 1 БВ (раней можна было разлічваць на папярэджанне);

ч.2: ад 20 да 30 км/г - штраф ад 1 да 3 БВ (было ад 1 да 2 БВ);

ч.3: ад 30 да 40 км/г - штраф ад 3 да 10 БВ (раней адлік перавышэння быў ад 30 км/г і вышэй);

ч.4: ад 40 і больш км/г - штраф ад 8 да 12 БВ.

Страціць пасведчанне кіроўцы за паўторнае перавышэнне можна ў тым выпадку, калі яшчэ раз перавысіў па частцы 2-4 (у «лепшым» выпадку адкараскаецеся штрафам ад 5 да 15 базавых). За паўторнае «трапленне» па ч.1 (ад 10 да 20 км/г) пазбаўленне пасведчання не прадугледжанае.

За перавышэнне, якое «злавілі» камеры фотафіксацыі, штраф накладаецца па ніжняй планцы арт.18.12 КоАП. лічым:

ад 10 да 20 км/г (штраф да 1 БВ) - паколькі мінімальнага памеру штрафу няма, то пакаранне складзе 0,5 БВ (ч.8 арт.6.4 «Штраф»);

ад 20 да 30 км/г - штраф 1 БВ;

ад 30 да 40 км/г - штраф 3 БВ;

ад 40 і больш км/г - штраф 8 БВ.

Заўвага

1. Перавышэнне хуткасці руху транспартнага сродку можа ўсталёўвацца на аснове сярэдняй хуткасці руху транспартнага сродку на пэўным участку. Пры гэтым сярэдняя хуткасць вызначаецца шляхам дзялення пройдзенай транспартным сродкам адлегласці на час, затрачаны гэтым транспартным сродкам на пераадоленне гэтага ўчастка.

2. Адказнасць за ўчыненне правапарушэнняў, прадугледжаных часткай 5 гэтага артыкула (паўторнасць на працягу года. - Заўвага рэд.), не ўжываецца пры фіксацыі перавышэння ўсталяванай хуткасці руху спецыяльнымі тэхнічнымі сродкамі, што працуюць у аўтаматычным рэжыме.

Сеў п'яны за стырно - аддасі больш грошай, даўжэй будзеш пешаходам

П'яных кіроўцаў стануць караць значна больш жорстка (арт.18.15). Калі этылавага спірту ў выдыханым паветры ўтрымліваецца да 0,8 праміле - штраф 100 базавых і пазбаўленне пасведчання на тры гады. Менавіта 100 базавых, а не ад 50 да 100, як было прадугледжана раней.

Ну а пры канцэнтрацыі алкаголю звыш 0,8 праміле, выяўленне прыкмет ужывання наркотыкаў ці іншых рэчываў прапануецца штраф 200 базавых велічынь і пазбаўленне пасведчання на 5 гадоў. Так што «п’яны» артыкул стаў больш суровым як па памеры штрафаў, так і па працягласці пазбаўлення пасведчання.

Паўторнае кіраванне без пасведчання кіроўцы - на грамадскія працы

За непрышпілены пас бяспекі паводле папярэдняга КоАП (ч.18.11) можна было адкараскацца папярэджаннем - зараз ніяк, толькі штраф да 1 базавай велічыні.

Без папярэджання застаўся і пункт пра эксплуатацыю аўто без тэхагляду. Цяпер будзе штраф да 3 БВ. Асобнае пакаранне ўвялі для юрыдычных асоб - штраф да 10 базавых.

Артыкул за кіраванне транспартным сродкам без пасведчання кіроўцы (арт.18.14 КоАП) у частцы памераў штрафу змен не зведаў. Па першай частцы - штраф ад 5 да 20 БВ, пры паўторы на працягу года (частка 2) - ад 20 да 50 БВ. Аднак да другой часткі акрамя штрафу цяпер прадугледзелі грамадскія працы або адміністрацыйны арышт.

Вердыкт

Змяненняў сапраўды шмат, і рэдакцыя «Автобизнеса» працягне вывучаць уведзеныя новаўвядзенні, каб данесці іх да нашых чытачоў. Толькі ёсць сумненні, што КоАП сапраўды «лібералізаваны», улічваючы новыя сумы штрафаў і прабелы, якія дазваляюць трактаваць закон так, як захочацца.