Суд Масквы арыштаваў Аляксея Кудзіна на два месяцы
17- 22.01.2021, 21:05
- 26,728
Пытанне аб яго экстрадыцыі будзе вырашана да 1 сакавіка.
Дамадзедаўскі суд на два месяцы арыштаваў беларускага байца-цяжкавагавіка Аляксея Кудзіна. Ён быў затрыманы ўчора ў Маскве на запыт беларускага рэжыму, паведамляе «Трибуна».
Чакаецца, што да 1 сакавіка будзе развязанае пытанне аб экстрадыцыі Кудзіна ў Беларусь.
Нагадаем, 19 лістапада ў маладзечанскім судзе павінна прайсці першае пасяджэнне ў справе байца Аляксея Кудзіна. Аднак ён на пасяджэнне не з'явіўся, пасля чаго быў абвешчаны ў вышук. Спартовец з'ехаў з краіны. Пра яго планы пакінуць Беларусь не ведала нават жонка.
Кудзіна затрымалі на акцыі пратэсту недалёка ад маладзечанскага гарадскога парку 10 жніўня. Адпусцілі 21 жніўня, распачаўшы ў яго дачыненні крымінальную справу і абраўшы меру стрымання ў выглядзе хатняга арышту.
Аляксея Кудзіна абвінавачваюць паводле артыкула 363 Крымінальнага кодэксу - «Супраціў супрацоўніку органаў унутраных спраў або іншай асобе, якія ахоўваюць грамадскі парадак». Максімальная санкцыя тут - да пяці гадоў пазбаўлення волі.
Кудзін з'яўляецца заслужаным майстрам спорту Беларусі, чэмпіёнам свету ў тайскім боксе сярод аматараў, чэмпіён свету ў кікбоксінгу сярод прафесіяналаў.