Дзяржпазыка Расеі, рубель і акцыі і падаюць у чаканні пратэстаў

Удзельнікі рынка ўпэўненыя ў будучых санкцыях, пытанне толькі ў іх калянасці.

Расейскі фондавы, валютны і пазыковы рынкі ў чацвер апынуліся ва ўладзе амаль франтальных продажаў на фоне росту геапалітычных рызык праз арышт Аляксея Навальнага і чаканняў пратэстных акцый, заклікі да якіх пазапаўнялі сацсеткі, паведамляе finanz.ru.

На 17.37 па Менску індэкс МасБіржы зніжаецца на 1,08%, а індэкс РТС - на 1,49% на фоне дружнага падзення амаль усіх «блакітных фішак».

Ашчадбанк губляе 1,89%, «Газпром» - 2,3%, «Раснафта» - 2,5%, ЛУКОЙЛ - 1,71%, «Нарнікель» - 0,43%, «Яндэкс» - 1%.

З буйных кампаній даражэюць хіба што «Растэлекам» і Саўкамфлот, і то на мізэрныя велічыні - 0,1% і 0,06% адпаведна.

Аднавілася падзенне на рынку расейскай дзяржпазыкі: індэкс RGBI, які адсочвае кошты АФП, губляе 0,18% і знаходзіцца за крок ад новага мінімуму з красавіка мінулага года.

Услед за пазыковым рынкам слабее рубель, нягледзячы на падатковы перыяд, які прымушае экспарцёраў прадаваць валюту для выплат у бюджэт.

Даляр дадае 47 капеек у параўнанні з адкрыццём таргоў і 22 капейкі да серады і таргуецца па 73,74 рубля. Еўра падаражэў на 57 капеек, да 89,53 рубля, а раней падчас сесіі дасягаў адзнакі 89,92 - максімальнай за тыдзень.

На расейскія актывы цісне «геапалітычны» шум, звязаны з падзеямі вакол Навальнага і магчымымі пратэстамі», пішуць аналітыкі« Лока-Інвесту».

Мітынг 23 студзеня за вызваленне апазіцыянера падарваў расейскі TikTok: хештэгі #свободуНавальному, #23января і падобныя ім набралі да 11 раніцы 21 студзеня больш за 200 млн праглядаў, падлічылі «Открытые медиа».

Паводле звестак Der Spiegel, Еўрапарламент падрыхтаваў рэзалюцыю з патрабаваннем да лідараў ЕЗ увесці санкцыі супраць Расеі за Навальнага і спыніць праект «Паўночны струмень - 2».

«Сам па сабе гэты факт негатыву для рубля не нясе, бо велізарныя сродкі ўжо выдаткаваныя на будаўніцтва, а будучыя паступленні ў прагнозах відавочна не ўлічваліся. Але агульная тэндэнцыя на абмежаванне эканамічнага супрацоўніцтва з РФ, калі яна будзе прадоўжаная, негатыўна адаб'ецца на сярэдняй і доўгатэрміновай перспектыве рубля і ўсёй эканомікі», - кажа дырэктар у інвестыцыях «Лока-Інвест» Дзмітрый Палявы.

У чацвер да заходніх лідараў, якія патрабуюць вызваліць Навальнага, далучылася канцлерка ФРГ Ангела Мэркель. «Федэральны ўрад мяркуе, што гэта было б правільным. І вельмі тэрмінова», - заявіла яна на прэс-канферэнцыі ў Берліне.