У беларускай прамысловасці трашчаць склады і растуць пазыкі

Чыноўнікі апублікавалі вынікі працы прамысловасці ў 2020 годзе.

Агулам становішча галіны вельмі трывожнае, піша сайт banki24.by.

За 2020 год прамысловая вытворчасць скарацілася на 0,7%. Пры гэтым у пачатку мінулага года Мінэканомікі закладвала ў прагноз рост на 2,2%.

Сярод галін прамысловасці самы вялікі спад у 2020 годзе паказалі нафтаперапрацоўка (мінус 10,8%), металургія (мінус 9,1%) і машынабудаванне (мінус 8,9%).

У нафтаперапрацоўцы цяжкія часы прыпалі на 1 квартал, калі былі праблемы з пастаўкамі расейскай нафты. З 2 квартала пачалося паступовае паляпшэнне сітуацыі.

У машынабудаванні праблемным месцам стаў жодзінскі БелАЗ. У 2020-м вытворчасць кар'ерных самазвалаў у Беларусі ўпала на 58%.

У металургічнай галіны валаўтваральнае прадпрыемства - гэта Беларускі металургічны завод у Жлобіне. Па Гомельскай вобласці выпуск у металургіі скараціўся на 4,6% да 2019 года.

Узровень складскіх запасаў у прамысловасці вымяраецца дваяк - як у грашовым вылічэнні, так і ў адсотках да сярэднямесячнага выпуску. У першым варыянце запасы гатовай прадукцыі на 1 студзеня склалі 5,075 млрд BYN, у другім - 65,3%.

У 2020 годзе ўлады выкарыстоўвалі «крэатыўныя» адміністрацыйныя метады барацьбы са складскімі запасамі. Мінфінансаў пайшло на выпуск 300 млн BYN аблігацый, задзейнічаных для фінансавання закупкі тэхнікі ў прадпрыемстваў машынабудавання.

Фінансавыя вынікі паступаюць з лагам у месяц да вытворчых. За 11 месяцаў прыбытак буйных і сярэдніх прадпрыемстваў прамысловасці вырас у намінале ўсяго на 2,2%. З папраўкай на інфляцыю рэальны прыбытак скараціўся да 2019 года.

Сярэдняя рэнтабельнасць продажаў у прамысловасці склала 9,3%. Аднак гэты паказчык, як сярэдняя тэмпература па лякарні.

Лепш сітуацыю раскрывае размеркаванне прадпрыемстваў па рэнтабельнасці. За 11 месяцаў 46,1% флагманаў прамысловасці былі альбо стратныя, альбо мелі рэнтабельнасць у межах 0-5%. Доля высокарэнтабельных кампаній (30 +%) склала толькі 1,8%.

Чысты прыбытак у прамысловасці скараціўся на 40,7% да 3,295 млрд BYN. Пры гэтым не ўсе страты 2020 года былі адлюстраваныя ў фінансавым выніку дзякуючы ўказу аб адмысловым парадку спісання курсавых розніц.

Сумарныя пазыкі прамысловасці на 1 снежня склалі 76,3 млрд BYN і гэта максімальная сума запазычанасці за гісторыю вядзення падлікаў. З пачатку 2020 года пазыкі выраслі на 17,3%, у асноўным за кошт дэвальвацыі рубля.

У 2020 годзе прамысловыя прадпрыемствы накіравалі на выплату крэдытаў і пазык 42,7 млрд BYN (+16,3% да 2019-га). На гэтыя мэты прамыслоўцы выдаткавалі эквівалент 37,7% прыбытку.