У Расеі вынеслі прысуд салдату, які расстраляў таварышаў са службы

Прысяжныя палічылі, што шараговец Шамсутдзінаў заслугоўвае памілавання.

У Чыце Другі Усходні акруговы вайсковы суд РФ прысудзіў да 24,5 гадоў пазбаўлення волі шарагоўца Раміля Шамсутдзінава, які расстраляў таварышаў са службы ў вайсковай частцы ў Забайкальскім краі. Пра гэта паведамляе lenta.ru.

«Прысуд за забойства васьмі асоб да 19 гадоў пазбаўлення волі, за замах на забойства двух асоб - да 9 гадоў пазбаўлення волі. Шляхам частковага складання тэрмінаў прызначыць канчатковае пакаранне ў выглядзе 24 гадоў 6 месяцаў пазбаўлення волі ў калоніі строгага рэжыму», - абвясціў прысуд суддзя.

Грамадзянскія пазовы сваякоў пацярпелых задаволены часткова - з Шамсутдзінава патрабавалі 28 мільёнаў рублёў кампенсацыі маральнай шкоды. У выніку з гэтай сумы родныя загінулых атрымаюць 9,5 мільёна рублёў. Ад пазоваў з кампенсацыяй матэрыяльнай шкоды ўсе пацярпелыя адмовіліся падчас працэсу.

Абвінавачванне прасіла прысудзіць Шамсутдзінава да 25 гадоў пазбаўлення волі - максімальнага тэрміна пазбаўлення волі, прадугледжанага Крымінальным кодэксам Расеі.

У снежні 2020 года прысяжныя засядацелі пасля трох дзён у дарадчым пакоі прызналі Шамсутдзінава вінаватым у забойстве васьмі таварышаў са службы і ў замаху на забойства яшчэ двух. Яны таксама палічылі, што шараговец заслугоўвае памілавання - а гэта азначае, што яму нельга прызначыць пажыццёвае пазбаўленне волі.

Яшчэ да абвяшчэння прысуду пацярпелыя заявілі, што, на іх думку, Шамсутдзінаў не павінен выйсці на волю. Прадстаўнік пацярпелых адвакат Сяргей Грыцкоў (былы вайсковы пракурор, ён уступіў у справу ўжо пасля абвяшчэння вердыкту) заявіў, што мае намер дамагацца скасавання прысуду і новага разгляду справы іншым складам суда. «Гэта ўзгодненая пазіцыя пацярпелых», - падкрэсліў ён.

25 кастрычніка 2019 года тэрміновай службы Шамсутдзінаў з аўтаматам АК-74М прыбыў з вайскоўцамі на тэрыторыю комплексу падрыхтоўкі дзяжурнай змены і прайшоў да навучальнага месцы «Стол рыштунку абоймаў». Атрымаўшы чатыры наборы па 30 патронаў у кожным, ён расстраляў таварышаў са службы, цэлячыся ім у галаву, грудзі і спіну. У выніку восем вайскоўцаў загінулі, яшчэ двое атрымалі цяжкія раны. Шамсутдзінаў заяўляў, што зазнаваў здзекі з боку таварышаў са службы, таму расстраляў іх.