Транспартны падатак у Беларусі давядзецца аплаціць загадзя

Мінфін падрыхтаваў дзіўны «сюрпрыз» для кіроўцаў.

Плацельшчыкі транспартнага падатку ў 2021 годзе павінны будуць унесці авансавы плацёж не пазней за 15 снежня. Пра гэта паведаміў намеснік начальніка аддзела ўскоснага падаткаабкладання, маёмасных падаткаў i iншых плацяжоў галоўнай управы падатковай палітыкі і даходаў бюджэту Міністэрства фінансаў Максім Канюшка, піша myfin.by.

З 1 студзеня замест дзяржаўнага збору за выдачу дазволу на допуск транспартнага сродку да ўдзелу ў дарожным руху ўведзены транспартны падатак. Выплачваецца ён без прывязкі да праходжання тэхагляду.

«Паколькі гэты год з'яўляецца пераходным для ўкаранення сістэмы збірання транспартнага падатку, то на працягу яго прадугледжаны пэўныя асаблівасці. Адна з іх - неабходнасць унесці авансавы плацёж не пазней як 15 снежня 2021 года. Адпаведнае паведамленне падатковыя органы накіруюць грамадзянам не пазней за 1 лістапада. Пры гэтым сума авансавага плацяжу за аўтамабілі складзе 29 рублёў, а ў дачыненні да матацыклаў, прычэпаў, прычэпаў-лецішчаў - 20 рублёў. У 2022 годзе яго залічаць пры выплаце падатку за 2021-ы з улікам фактычнага часу валодання фізічнымі транспартнымі сродкамі», - распавёў Максім Канюшка.

З каго не спаганяецца падатак?

Падатак не будзе збірацца з транспартных сродкаў, знятых з уліку з 1 студзеня да 1 ліпеня 2021 года. «Гэта неабходна ў тым ліку для прывядзення адпаведнай інфармацыйнай базы ў актуальны стан. Да названай даты мяркуецца ўстанаўленне спрошчанай працэдуры зняцця з уліку транспартных сродкаў, якія выбылі з дарожнага руху», - растлумачыў прадстаўнік Мінфіна.

Акрамя таго, асобы, якія заплацілі дзяржаўны падатак за допуск да дарожнага руху, вызваляюцца ад выплаты транспартнага падатку да заканчэння тэрміну яго дзеяння.

Налічваць гэты падатак будзе МПЗ, а сам ён будзе блізкі да маёмасных падатках. У выпадку нявыплаты падатку яго спагнанне будзе праводзіцца праз суд або натарыяльны надпіс.