Мянчук абвясціў галадоўку з салідарнасці з Ігарам Лосікам
4- 19.01.2021, 18:04
- 16,721
Блогер галадае ўжо больш за месяц.
Мянчук Уладзіслаў Багамольнікаў з сённяшняга дня, 19 студзеня, абвясціў аб сваёй галадоўцы, паведамляе tut.by. На такі крок мужчына адважыўся, каб выказаць сваю салідарнасць з Ігарам Лосікам, адміністратарам тэлеграм-канала «Беларусь галаўнога мозгу». Лосік галадае ўжо больш за месяц - з 15 снежня 2020 года. Паводле інфармацыі «Радыё Свабода», Лосіку становіцца горш: з'явіліся праблемы з ціскам.
Уладзіслаў даслаў ліст, у якім тлумачыць матывы свайго ўчынку.
«Я, Уладзіслаў Багамольнікаў, далучаюся да галадоўкі Ігара Лосіка.
Планую прадаўжаць, пакуль галадоўку прадаўжае Ігар. Калі здарыцца непапраўнае, я паспрабую пратрымацца столькі ж дзён, колькі пратрымаўся ён.
Спадзяюся, што да гэтага не дойдзе і яму заменяць меру стрымання на хатні арышт. Ці ён сам адмовіцца ад задумы, калі даведаецца, што цяпер гаворка ідзе не толькі пра ягонае ўласнае здароўе.
У мяне ёсць асабістыя палітычныя погляды, але цяпер я пра іх не кажу. Мне здаецца, што Ігар здзяйсняе памылку. Ягоны жэст маглі б ацаніць, але не ў кіраўніцтве нашай краіны. Магчыма, я памыляюся. Але іх дзеянні пераканалі б мяне хутчэй, чым словы.
Я ўпэўнены, што абсалютна ўсе людзі могуць мяняцца. І той чыноўнік, ад каго цяпер залежыць жыццё Ігара Лосіка, можа ўзяць на сябе адказнасць за ягонае жыццё або сысці з пасады, каб не браць адказнасць за іншы варыянт. І перад тым, хто яго зменіць, будзе стаяць той жа выбар.
Сёння я напісаў Ігару ліст. Не буду адгаворваць яго, але паведамлю пра сваю пастанову. Хай ён паступіць, як палічыць патрэбным.
Той самы ліст, які ўжо адпраўлены Ігару Лосіку 19 студзеня.
У мяне няма нейкіх дасягненняў, каб казаць, што я патрэбны грамадству ці дзяржаве. Замест мяне мог бы знайсціся больш годны, але яго няма, а прайшоў цэлы месяц.
У мяне таксама ёсць дачка, як у Ігара, толькі амаль дарослая. І я страціў свайго бацьку ў дзяцінстве. А сёння, калі б давялося выбіраць, ці стане мой бацька героем, так, каб хоць помнік і вуліца ў ягоны гонар, ці ж застанецца жывы - я абраў бы другое. Упэўнены, няма большай адказнасці, чым адказнасць перад сваім дзіцем. Гэта адзіны чалавек, які з'явіўся ў свеце з нашай уласнай волі.
Я таксама рызыкую, але магу разлічваць, што чалавек, ад якога залежыць зыход справы, своечасова спыніцца. А Ігару Лосіку няма на што разлічваць, уладам, відавочна, абыякава, што з ім стане.
Чуў, што лісты цяпер не даходзяць, але такі ліст павінна дайсці, гэта ў інтарэсах усіх бакоў.
Пераконваць Ігара зыходзячы з меркаванняў уласнага дабрабыту не стану, бо сам на яго месцы на гэта не пагадзіўся б».
Нагадаем, адміністратара тэлеграм-канала «Беларусь галаўнога мозгу» Ігара Лосіка затрымалі 25 чэрвеня. Стала вядома, што ён праходзіць абвінавачаным паводле крымінальнай справе на падставе арт.342 КК РБ (Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх). Такім чынам, пад вартай адміністратар знаходзіцца больш за паўгода.
Ігар Лосік трымае галадоўку ўжо больш за месяц. Ён абвясціў яе 15 снежня, калі стала вядома, што яму выставілі новае абвінавачанне - на падставе артыкула 13 (Падрыхтоўка да злачынства) Крымінальнага кодэкса ў частцы 2 артыкула 293 (Удзел у масавых беспарадках). Гэта і дало магчымасць у перспектыве падоўжыць тэрмін утрымання палітвязня пад вартай. Скарга на падаўжэнне тэрміну зняволення была адхіленая.