У Беларусі ствараюць новую сістэму ўліку даходаў

Абмяркоўваць яе не будуць праз цікавую прычыну.

Высвятляецца, да сённяшняга дня ў Беларусі працуе не вельмі дасканалая сістэма ўліку нашых з вамі даходаў. Прынамсі, так лічаць у МПЗ. Таму вядзецца распрацоўка новай аўтаматызаванай сістэмы. Дарэчы, абмеркаванне яе не плануецца, бо яна нібыта не закранае грамадскія інтарэсы, піша InfoBank.by.

Стала вядома, што ў Беларусі падрыхтаваная пастанова «Аб прадстаўленні звестак аб даходах фізічных асобаў».

У ёй сказана, што ўладальнікам базы звестак аб даходах фізічных асоб, якая з'яўляецца часткай аўтаматызаванай інфармацыйнай сістэмы ўліку даходаў фізічных асоб, з'яўляецца Міністэрства падаткаў і збораў(МПЗ).

Для чаго спатрэбілася новая сістэма? Распрацоўнікі новай Пастановы адзначаюць:

- Адсутнасць у базе даходаў поўнага аб'ёму неабходных звестак не дазваляе падатковым, праваахоўным і іншым зацікаўленым органам забяспечыць якасны кантроль за выкананнем падатковага, антыкарупцыйнага і іншага заканадаўства.

Пры гэтым распрацоўнікі разважылі, што шырокай грамадскасці пра новую сістэму ведаць не абавязкова. Вось выснова распрацоўнікаў:

- Публічнае абмеркаванне праекта пастановы не праводзілася, бо праект не закранаюць грамадскія інтарэсы.

Звесткі будуць падаваць у Міністэрства працы і сацыяльнай абароны, Мінфін, Фонд сацыяльнай абароны, Нацыянальнае кадастравае агенцтва, Белдзяржстрах, аператары паштовай сувязі і банкі, а таксама наогул арганізацыі, ІП, натарыусы і адвакаты.

У базу звестак АІС уліку даходаў фізічных асоб-грамадзян уключаецца наступная абавязковая інфармацыя:

• ідэнтыфікацыйны нумар

• прозвішча, уласнае імя, імя па бацьку

• дата, месяц, год нараджэння

• пол

• звесткі аб грамадзянстве

• звесткі аб рэгістрацыі па месцы жыхарства або месцы знаходжання

• назва, серыя і нумар дакумента, які сведчыць асобу

• тып даходу

• перыяд, за які налiчаны даход і/або дата атрымання даходу

• памер даходу

Акрамя таго, у базе звестак АІС уліку даходаў фізічных асоб могуць утрымлівацца іншыя «асноўныя і дадатковыя персанальныя звесткі фізічных асоб, а таксама звесткі аб рэквізітах дакументаў, якія пацвярджаюць такія персанальныя звесткі».

Пры выяўленні непаўнаты або недакладнасці прадстаўленых звестак аб даходах фізічных асоб дзяржаўныя органы, іншыя арганізацыі, прадстаўніцтвы, ІП, натарыусы, адвакаты - на працягу 30 каляндарных дзён з моманту іх выяўлення павінны прадстаўляць удакладненыя звесткі.