Нямеччына запатрабавала ад Расеі неадкладна расследаваць злачынствы супраць Навальнага
7- 16.01.2021, 12:45
- 8,787
Маскве перадалі пратаколы допыту палітыка ў пракуратуры Берліна.
Фэдэральная ўстанова ў справах юстыцыі ФРГ адказала на чатыры запыты Расеі датычна справы аб атручэнні палітыка Аляксея Навальнага, паведамляе Deutsche Welle.
Сярод іншага Маскве перадалі пратаколы допыту палітыка ў пракуратуры Берліна.
«Федэральны ўрад зыходзіць з таго, што ўрад РФ цяпер неадкладна зробіць усе неабходныя крокі для расследавання злачынства супраць спадара Навальнага. Гэтае злачынства павінна быць расследаванае ў Расеі», – цытуе Deutsche Welle прадстаўніка ўстановы.
Навальнага дапытала пракуратура Берліна ў якасці пацярпелага, паводле словаў прадстаўніка міністэрства юстыцыі, апазіцыянер «грунтоўна адказаў на ўсе пытанні, зададзеныя расейскай генеральнай пракуратурай».
Асабістыя звесткі пра стан ягонага здароўя, згодна з прававымі нормамі ФРГ, падпадаюць пад строгую абарону, і Навальны не пагадзіўся на перадачу гэтай інфармацыі расейскаму боку.
Навальны знаходзіцца ў Нямеччыне са жніўня 2020 года, куды яго прывезлі на лячэнне пасля атручвання ў Расеі. Палітык абяцаў вярнуцца ў РФ 17 студзеня.