Беларускія прадпрыемствы прыдушаныя крэдыторамі

Выплаты кампаній па крэдытах і пазыках дасягнулі касмічных велічынь.

У параўнанні з папярэднім годам пазыковая нагрузка толькі расце, піша сайт banki24.by.

За 11 месяцаў 2020 года буйныя і сярэднія прадпрыемствы Беларусі накіравалі на выплату крэдытаў і пазык 66 млрд BYN. У параўнанні з 2019 годам пазыковая нагрузка на кампаніі-флагманы вырасла на 11,3%.

Таксама пазыковая нагрузка павялічылася ў суадносінах з прыбыткам. Калі ў 2019-м прадпрыемствы пералічылі крэдыторам эквівалент 27,1% прыбытку, то ў 2020-м - ужо 28,6%.

Больш за ўсіх заплацілі крэдыторам прадпрыемствы Менска - 16,5 мільярдаў BYN. Што да 2019 года нагрузка вырасла на 6,3%. На выплату абавязацельстваў сышло 21,9% прыбытку.

Сумнае лідарства ва ўдзельнай запазычанасці захапілі арганізацыі Віцебскай вобласці. У гэтым рэгіёне прадпрыемствы накіравалі крэдыторам 38,9% прыбытку. Такая высокая пазыковая нагрузка тлумачыцца мадэрнізацыяй нафтаперапрацоўкі за пазыковыя рэсурсы банкаў. У грашовым вылічэнні Віцебская вобласць аддала крэдыторам 9,1 млрд BYN, што на 3,9% вышэй, чым у 2019-м.

Самы хуткі рост выплат паказалі прадпрыемствы Гарадзенскай вобласці. За 11 месяцаў 2020 года гарадзенцы накіравалі крэдыторам на 25% грошай больш, чым у 2019-м. У абсалютным вылічэнні выплачаныя пазыкі склалі 7,4 млрд BYN.

Менш за ўсё загружаныя пазыкамі кампаніі Берасцейскай вобласці. Па-першае, берасцейцы выплацілі крэдыторам 4 млрд BYN (мінімум сярод рэгіёнаў), па-другое, на гэтыя мэты пайшло толькі 17,1% прыбытку (таксама мінімум у краіне). У параўнанні з 2019 годам грашовыя выплаты выраслі на 16,3%.

Адносна невялікую нагрузку на Берасцейшчыне можна растлумачыць тым, што вобласць апынулася менш закранутай так званай мадэрнізацыяй. З гэтай прычыны тамтэйшыя прадпрыемствы дзяржсектара мелі менш шанцаў патрапіць у пазыковую кабалу.

У астатніх абласцях сітуацыя з выплатамі крэдыторам была наступнай: Гомельская - 12,6 млрд BYN (+4,8% да 2019 года), Менская - 11 млрд BYN (+23,8%), Магілёўская - 5,4 млрд BYN (+13,5%). Удзельная нагрузка ў адсотках ад прыбытку ў гэтых рэгіёнах склала 36,6%, 30,3% і 34,1% адпаведна.

Сярод тыпаў дзейнасці найбольшая нагрузка ў грашовым вылічэнні легла на прамысловасць (42,7 млрд BYN). У параўнанні з 2019 годам сума выплат крэдыторам вырасла на 16,3%, удзельная нагрузка склала 37,7% ад прыбытку.

Таксама значныя сумы пералічылі крэдыторам арганізацыі аптовага (7,5 млрд BYN) і раздробнага (5,1 мільярда BYN) гандлю, транспарту (2 млрд BYN), сельскай гаспадаркі (1,9 мільярда BYN) і будаўніцтва (1,8 млрд BYN).