Як санкцыі б'юць па кішэні беларускага рэжыму

Прадпрыемствы, якія падтрымліваюць рэжым, сутыкнуліся з блакаваннем рахункаў і маюць цяжкасці з пастаўкамі дэталяў.

Беларускія ўлады ўжо заяўляюць аб затрымках дэталяў і матэрыялаў для некаторых прадпрыемстваў, піша сайт naviny.by.

«Тая ж Фінляндыя адмовілася пастаўляць пэўныя дэталі. Нямеччына пачала стрымліваць пастаўкі. Але гэта чарговы стымул для прадпрыемстваў Міністэрства прамысловасці займацца пытаннямі імпартазамяшчэння. Мы цяпер уважліва паглядзім тую наменклатуру, якая вызначае вытворчасць канчатковага прадукту, і прымем адпаведныя пастановы. Яшчэ адзін са спосабаў - знайсці іншых пастаўшчыкоў, якія гатовыя сёння пастаўляць прадукцыю. Не хоча пастаўляць Еўропа, ёсць Кітай», - паведаміў тэлеканалу «Беларусь 1» міністр прамысловасці Пётр Пархомчык.

Аб праблемах з пастаўкамі дэталяў распавядаў і старшыня рады дырэктараў машынабудаўнічага холдынгу «Амкадор» Аляксандра Шакуцін. ЕЗ увёў супраць бізнэсоўца персанальныя санкцыі за «падтрымку рэжыму Лукашэнкі».

«Гэта санкцыі не толькі ў дачыненні да мяне, яны распаўсюджваюцца на ўсё, чым я валодаю. І на «Амкадор», акцыянерам якога я з'яўляюся, таксама. Паступілі вельмі хітра. <...> Так, «Амкадор» таксама страціць, але гэта не смяротна. Можа, нам удасца тыя вузлы, якія мы бралі ў Еўразвязе, неўзабаве замяніць - паставіць з Кітая, Паўднёвай Карэі або Японіі. Або самім гэтыя вузлы пачаць рабіць. Калі ёсць праблемы, значыць, павінны быць і шляхі іх развязання», - паведаміў «Народнай волі» Шакуцін.

Сур’ёзныя праблемы паўсталі ў санаторыя «Беларусь» у Друскеніках, які ўваходзіць у структуру Кіраўніцтва спраў прэзідэнта Беларусі. Swedbank заблакаваў рахункі санаторыя. Установа не можа разлічыцца з работнікамі і пастаўшчыкамі паслуг, а таксама атрымаць фінансаванне з Беларусі, патрэбнае для ўтрымання.

Кіраўніцтва і работнікі санаторыя папрасілі ў літоўскага ўрада ўнесці яснасць у пытаннях іх далейшай працы і заклікалі перагледзець законнасць выкарыстання санкцый ЕЗ, піша Delfi.

На паходзе - чацвёрты пакет санкцый

«Санкцыі, як бы іх не называлі сімвалічнымі, адназначна працуюць. У нас ёсць звесткі, што еўрапейскія банкі пачынаюць замарожваць альбо максімальна зацягваць выплаты, якія праводзяцца на адрас беларускіх кампаній з удзелам дзяржавы, таму што ў іх ёсць асцярогі, што яны зазанаюць за супрацоўніцтва з рэжымам. Калі раней можна было планаваць узаемадзеянне з беларускімі контрагентамі ў перспектыве года або некалькіх гадоў, то цяпер усё звузілася да месяцаў і тыдняў. Пакуль ва ўсіх жаданне паставіць супрацоўніцтва на паўзу, каб зразумець, у які бок развіваецца сітуацыя. Еўрапейскія партнёры не хочуць страціць рэпутацыю, кантракты і грошы», - сказаў у каментары адказны за замежную палітыку і гандаль у Народным антыкрызісным кіраванні Анатоль Котаў.

Паводле ягонай інфармацыі, у 20-я дні студзеня чакаецца чацвёрты санкцыйных пакет ЕЗ у дачыненні да рэжыму Лукашэнкі. Абмежаванні могуць быць уведзеныя супраць бізнэсоўцаў і кампаній, якія былі кандыдатамі ў трэці санкцыйных пакет, але пасля былі з яго выключаны. Сярод такіх кандыдатаў называўся бізнэсовец Аляксей Алексін, інтарэсы якога сканцэнтраваны ў банкаўскай, тытунёвай, лагістычнай сферах.

«Мы спадзяёмся, што ўлада зразумее, што рэпрэсіі і знішчэнне незалежнага меркавання і бізнэсу - гэта шлях у нікуды. Ніхто не хоча раскідаць эканоміку, але гэта робіць менавіта ўлада. І як бы яна не спрабавала перакласці адказнасць на іншых, паглядзець трэба ў люстэрка», - падкрэсліў Котаў.

Зараз санкцыі ЕЗ дзейнічаюць у дачыненні да 88 фізічных асоб, якія, на думку Брусэля, адказныя за фальсіфікацыю выбараў і рэпрэсіі супраць мірных дэманстрантаў. У спіс таксама патрапілі сем прадпрыемстваў, якія «падтрымліваюць рэжым Лукашэнкі».