У Карабаху турэцкія беспілотнікі знішчылі савецкія «Восы» і «Стрэлы»
- 29.09.2020, 15:11
- 44,160
Дроны Bayraktar TB2 зарэкамендавалі сябе падчас нападаў на расейскую тэхніку ў Лібіі і Сірыі.
Азербайджанскія вайскоўцы знішчылі ў Нагорным Карабаху не менш за шэсць сістэм супрацьпаветранай абароны (СПА) 9К33 «Аса» і тры 9К35 «Страла-10» савецкай распрацоўкі, піша The Drive (пераклад - lenta.ru).
«Хоць улады Азербайджана не паведамілі, які тып беспілотнікаў выкарыстоўваўся для такіх удараў, цалкам магчыма, што гаворка ідзе пра Bayraktar TB2 турэцкай вытворчасці, якія, як паведамляецца, краіна пачала набываць у чэрвені», - распавядае амерыканскае выданне.
The Drive нагадвае, што раней Bayraktar TB2 «ужо зарэкамендаваў сябе ў баі, асабліва супраць сродкаў СПА блізкага дзеяння, у Сірыі і Лібіі», дзе былі, напрыклад, знішчаныя зенітныя ракетна-гарматныя комплексы (ЗРГК) «Панцыр-С1» расейскай вытворчасці.
Выданне адзначае, што за мінулыя гады Азербайджан набыў мноства беспілотнікаў, у тым ліку ў ізраільскай кампаніі Israel Aerospace Industries (IAI). Згодна з інфармацыяй The Drive, «у Арменіі няма такіх магчымасцяў».
Выданне піша, што ў рэгіёне падчас ваенных дзеянняў была ліквідаваная і азербайджанская тэхніка, напрыклад, гелікаптэры, беспілотнікі, танкі і баявыя машыны пяхоты. «У Арменіі ды Азербайджана ёсць свае ўласныя арсеналы больш сучаснага ўзбраення, якое, відавочна, яшчэ не з'явілася ў канфлікце, у тым ліку знішчальнікі», - рэзюмуе The Drive.
У верасні на фоне абвастрэння канфлікту ў Нагорным Карабаху Мінабароны Азербайджана абвясціла аб поўнамаштабнай контрнаступальнай ваеннай аперацыі ў рэгіёне. Тады ж прэс-сакратарка Мінабароны Арменіі Шушан Сцепанян паведаміла, што армянскія сілы збілі ў Нагорным Карабаху два гелікаптэры і тры беспілотныя лятальныя апараты Узброеных сіл Азербайджана.
У чэрвені Defense Express, спасылаючыся на ўласныя крыніцы, паведаміла, што за апошнія гады падчас ваенных канфліктаў у Сірыі і Лібіі было знішчана не менш як 23 комплексаў «Панцыр-С1» расейскай вытворчасці.