У Магілёве карнікі Караева паранілі чалавека

З Ленінскага раённага аддзела міліцыі мужчыну даставілі ў бальніцу хуткай дапамогі.

Пасля разгону акцыі 27 верасня ў Магілёве быў шпіталізаваны 38-гадовы Андрэй Вярбіцкі - яму разбілі твар. Як паведамляе «Радыё Свабода», з Ленінскага раённага аддзела міліцыі мужчыну даставілі ў бальніцу хуткай дапамогі. Праверкай гэтага факту займаецца Следчы камітэт: следчы прыходзіў да пацярпелага 27 і 28 верасня.

Паведамляецца, што траўму Вярбіцкі атрымаў на плошчы Арджанікідзэ, дзе супраць пратэстоўцаў міліцыянты ўжылі сілу і спецсродкі: стралялі ў паветра з святлошумавой ракетніцы.

Магілёвец кажа, што ў групе амапаўцаў больш жорстка за ўсё вялі сябе два міліцыянты, якія мэтанакіравана ішлі на яго і мужчыну побач, якому перапала значна больш.

«Я даслоўна на секунду паглядзеў на мужчыну побач, і мне адразу нанеслі ўдар, але не дубінкай, таму што ад яе застаўся б шнар. А так у мяне пад вокам абдзёртая скура і лоб рассечаны. Я схапіўся за твар. Адчуў, што пацякла кроў. Згрупаваўся, локцямі прыкрыў тулава. Прасіў, каб мяне не білі, таму што сам пайду, куды скажуць. Калі я сагнуўся, прагучаў стрэл. Каля мяне бліснула. Потым яшчэ было два ўдары па баках, але не скажу, што моцныя», - успамінае магілёвец.

У мікрааўтобусе Вярбіцкі, з яго слоў, прасіў выклікаць хуткую, бо пачаў страчваць прытомнасць. «У аддзел міліцыі мяне вялі, таму што карцінка перада мною была расплывістая. Праз гадзіну ў аддзел прыехала хуткая», - распавядае ён.

Паводле папярэдняга дыягназу, у Вярбіцкага чэрапна-мазгавая траўма лёгкай ступені, выцятая рана ў лобнай вобласці. Яму прызначылі шэраг працэдур для дэталёвага абследавання.

Паводле падлікаў праваабаронцаў, 27 верасня міліцыянты затрымалі ў Магілёве больш за 30 чалавек.