Алена Леўчанка: Мы адчуваем сапраўдную сілу беларускага народа

Вядомая баскетбалістка звярнулася да беларусаў.

Вядомая беларуская баскетбалістка, бронзавая прызёрка чэмпіянату Еўропы Алена Леўчанка ў эфіры YouTube-канала «Радыё Свабода» звярнулася да беларусаў.

- Насамрэч хачу, каб мяне пачулі беларусы: я веру, што гэтае слова нас неўзабаве пакіне. Кожнаму беларусу цяпер у нейкай меры некамфортна і баязліва. У нас ва ўсіх ёсць родныя людзі - гэта тыя, за каго мы перажываем больш за ўсё. Але ж акрамя гэтай боязі ёсць вера.

У маёй кар'еры было вельмі шмат траўмаў, было вельмі шмат рэчаў, калі мне казалі, што я ніколі больш не зайграю, калі на мне ставілі крыж. Было вельмі шмат момантаў, дзе мне сапраўды трэба было змагацца, і я знаходзіла ў сабе сілы гэта рабіць.

І я веру, я ведаю, што наш народ настолькі моцны. Я думаю, што тое, што адбываецца цяпер... Усе кажуць, што ў нас пачуцці то ўверх, то мы падаем уніз. Гэта абсалютна нармальна.

Але тое, наколькі мы моцныя, мы гэта адчуваем толькі цяпер. І адчуваем сапраўдную сілу беларускага народа. Мы цяпер па-сапраўднаму раскрываемся. Мы ні ў якім разе не павінны спыняцца. Мы павінны ісці далей, бо вера заўсёды перамагае страх, - сказала Леўчанка.