Баскетбалістка Алена Леўчанка: Гэта ўжо зусім іншы народ

Нас спрабуюць запалохаць, а мы зноў выходзім.

Вядомая беларуская баскетбалістка Алена Леўчанка ходзіць не толькі на нядзельныя Маршы адзінства, але і на жаночыя акцыі. Яна захапляецца салідарнасцю беларусаў і выступае за перамены. У інтэрв'ю «Радыё Свабода» баскетбалістка распавяла пра сваю пазіцыю аб сітуацыі ў краіне.

- Я гуляла ў многіх краінах, і адтуль мне пішуць людзі, захопленыя салідарнасцю беларусаў. Нават тыя ж расейцы. Іх уражваюць менавіта мірныя пратэсты, на якія мы маем права і паводле Канстытуцыі Рэспублікі Беларусь, і паводле хартыі ААН.

Ніхто не можа зразумець прыроду такой жорсткасці сілавікоў. Улада карыстаецца старымі метадамі - рэпрэсаваць, запалохаць, пабіць. Каб чалавек схаваўся ў нару і сціх. Толькі на такое і здольныя. Але дух не забіць. Гэта ўжо зусім іншы народ.

Леўчанка таксама выказала сваё стаўленне да ціску на спартоўцаў і паскардзілася на беззаконне.

- Давайце называць рэчы сваімі імёнамі: гэта [ціск на спартоўцаў] рэпрэсіі. З аднаго боку, смешна чуць іх ліпавыя аргументы, каб пакараць, звольніць. З іншага - вельмі сумна.

Пра законы ўспамінаюць толькі тады, калі трэба апраўдаць беззаконне. Калі нельга арыштаваць, прыкрываюцца «несанкцыянаваным мерапрыемствам», хоць кожны чалавек, паўтаруся, мае права на мірны пратэст.

А як пакараць вінаватых за насілле - няма закона. Калі людзей білі і яны кідаліся ў Камсамольскае возера, судзілі ратавальнікаў. Абсурд! Хлопцам законам загадана дапамагаць тым, хто ў бядзе. А іх садзяць, даюць па тысячы рублёў штрафу, бо не здалі перапалоханую моладзь на разарванне супрацоўнікам АМАП.

Двудушнасць, узведзеная ў закон. Як пакараць, будзе вам закон. А па-за ім можна біць жанчын, абкладаць велічэзнымі штрафамі. Часам хочацца проста крычаць. І ўсё адно трэба захоўваць стойкасць, вытрымку. Думаю, беларусы яшчэ самі не да канца ўсведамляюць, наколькі моцныя. Хоць гэта і праяўляецца штодня. Нас спрабуюць запалохаць, а мы зноў выходзім. Больш за тое, далучаецца ўсё больш людзей, якія выказваюць сваю пазіцыю.