Кітайскія кампаніі выправадзяць з амерыканскіх біржаў

Мінфін ЗША ўводзіць новыя правілы.

Адміністрацыя Дональда Трампа падрыхтавала новы ўдар па кітайскіх кампаніях, акцыі якіх таргуюцца на біржах ЗША.

Як паведамляе The Wall Street Journal (пераклад - finanz.ru), Мінфін Штатаў і Камісія ў каштоўных паперах і рынках (SEC) маюць намер зрабіць больш жорсткімі правілы бухгалтарскага ўліку для карпарацый з КНР, якія маюць лістынг.

З 2022 года яны будуць абавязаныя падпарадкоўвацца тым жа нормам, што і амерыканскія кампаніі, а таксама адкрыць сваю справаздачнасць для аўдытарскіх праверак.

На сёння кітайскія кампаніі, у тым ліку гіганты ў асобе Alibaba і Tecent, вызваленыя ад гэтых патрабаванняў. Гэта прыводзіць да шматлiкiх выпадкаў «махлярства» і парушэнняў правоў інвестараў, казаў у чэрвені кіраўнік Дзярждэпу Майк Пампэа. У выпадку адмовы выконваць патрабаванні кампаніі з КНР будуць дэлістынгаваныя з амерыканскіх біржаў.

Кампаніі, якія толькі плануюць выйсці на IPO (працэдура першаснага размяшчэння акцый) на біржах ЗША, змогуць зрабіць гэта пры ўмове допуску амерыканскіх аўдытараў да справаздачнасці.

Сумарная капіталізацыя кітайскіх акцый на біржах NYSE і Nasdaq дасягае 1,3 трыльёна даляраў.

«Прымус іх сысці з амерыканскіх фондавых біржаў прычыніць вялікую шкоду інтарэсам саміх ЗША», - казаў у чэрвені афіцыйны прадстаўнік МЗС КНР Гэн Шуан.

«Заявы ЗША аб тым, што кітайскія кампаніі не выконваюць адпаведныя нарматыўныя акты Злучаных Штатаў, з'яўляюцца скажонымі. Сапраўды, у некаторых кітайскіх кампаніях былі некаторыя выпадкі ашуканскіх паводзінаў, аднак гэта не адлюстроўвае сітуацыю з усімі кітайскімі кампаніямі, якія прысутнічаюць на біржы ў ЗША», - адзначыў дыпламат.