Беларускія мастакі выйшлі ў Менску на акцыю салідарнасці

Фотафакт.

Мастакі і іншыя творчыя работнікі выйшлі 13 жніўня ў Менску на акцыю супраць гвалту беларускіх сілавікоў і фальсіфікацыі прэзідэнцкіх выбараў, паведамляе naviny.by.

У ланцуг уздоўж вуліцы Казлова, каля Палаца мастацтваў выстраілася блізу 150 чалавек. «Наша акцыя называецца «Не малюй, бастуй». Мы як мастакі як можам выказваем пратэст чарговай узурпацыі, якая адбылася ў нашай краіне. Сённяшняй акцыяй мы выказваем салідарнасць з усімі затрыманым і пацярпелымі за апошнія дні», - паведаміла БелаПАН адна з удзельніц, мастачка Юлія.

Удзельнікі акцыі трымалі ў руках белыя аркушы паперы, кветкі, плакаты, на некаторых з іх былі лозунгі: «Мастакі з народам, Жыве Беларусь!», «Спыніць гвалт», «Лепш маляваць карцінкі, чым пратаколы». Выступленняў або зваротаў не было. Аўтамабілісты падтрымлівалі ўдзельнікаў акцыі аўтамабільнымі гудкамі. Мастакі з белымі лістамі патлумачылі БелаПАН, што робяць гэта ў знак таго, што сёння яны не малююць, а страйкуюць.

«Адзін з маіх помнікаў Анастасія Слуцкая, яна абараняла свой горад ад татараў, яна не біла сваіх грамадзян, яна не забівала сваіх людзей. Яшчэ адзін помнік, які я рабіў у Горадні Давіду Гарадзенскаму, ён біўся з тэўтонскім ордэнам, ён біўся з ворагамі, але ён не забіваў сваіх грамадзян, ён не катаваў іх, не катаваў у засценках. Мой помнік сумесны Гедымін. Я скульптар - я не злачынца, я не утрыманец, я не маргінал, я не дармаед», - сказаў скульптар, сябра Звязу мастакоў Сяргей Аганаў.

Ён звярнуўся да людзей, якія працуюць у органах: «Спыніцеся, калі ласка».

«Гэта мая краіна, гэта мая культура, я супраць таго, што тут адбываецца. Я выйшаў на мірную дэманстрацыю, выйшаў бараніць свае правы, - сказаў мастак-фундаменталіст Аляксей. - Як жыхар гэтай краіны, як мастак. Мне многае тут не падабаецца: эканамічная складнік, як абыходзяцца з людзьмі, калі ты выйшаў на дэманстрацыю, выйшаў мірна бараніць свае правы, то цябе будуць біць».

З яго слоў, ён не хоча з'язджаць з Беларусі, але не хоча, каб у такой краіне (з гвалтам) раслі яго дзеці.

«Вольныя мастакі павінны жыць у вольнай краіне», - заявілі мастакі Аліна Саўчанка і Руслан Вашкевіч.