Радаслаў Сікорскі: Злачынствамі беларускіх спецслужбаў можа заняцца Міжнародны крымінальны суд у Гаазе
74- 13.08.2020, 12:42
- 91,888
ФОТА: AP
Заява еўрадэпутата ад Польшчы.
Дэпутат Еўрапейскага парламента, былы міністр замежных спраў Польшчы Радаслаў Сікорскі пракаментаваў паведамленні пра падазрэнні ў забойствах мірных праэстоўцаў беларускімі спецслужбамі, піша карэспандэнт Charter97.org ў Брусэлі.
«Калі паведамленні аб забойствах спецслужбамі ў Беларусі пацвердзяцца, мы пакінем тэрыторыю санкцый і пяройдзем у сферу дзеяння Міжнароднага крымінальнага суда для адказных службовых асоб», - напісаў Радаслаў Сікорскі ў Твітары.
If reports of murders by the security services in Belorus are confirmed, we will be leaving the territory of sanctions and entering the realm of International Criminal Court for responsible officials.
— Radosław Sikorski MEP 🇵🇱🇪🇺 (@sikorskiradek) August 12, 2020
Міжнародны крымінальны суд (скарочана - МКС) - міжнародны орган крымінальнай юстыцыі, размешчаны ў Гаазе, у кампетэнцыю якога ўваходзіць пераслед асоб, адказных за генацыд, вайсковыя злачынствы, злачынствы супраць чалавецтва, а таксама вайсковую агрэсію.
Для запуску працэсу ў Міжнародным крымінальным судзе патрэбны зварот адной з краін-удзельніц або рады бяспекі ААН. Пры пэўных умовах пракурор суда можа пачаць расследаванне самастойна.
У 2008 годзе Міжнародны крымінальны суд упершыню выдаў ордэр на арышт дзейнага кіраўніка дзяржавы - прэзідэнта Судану Амара аль-Башыра ў сувязі з канфліктам у Дарфуры.
У 2011 года Міжнародны крымінальны суд выдаў ордэры на арышт Муамара Кадафі і ягонага сына Саіфа аль-Іслама.
