12 жнiўня 2020, Серада, 9:58
Сім сім, Хартыя 97!
Рубрыкі

СБУ: Расейскі куратар генерала-здрадніка Шайтанава кіраваў баявікамі на Данбасе

3
СБУ: Расейскі куратар генерала-здрадніка Шайтанава кіраваў баявікамі на Данбасе
ВАЛЕРЫЙ ШАЙТАНАЎ (У ЦЭНТРЫ)

Апублікаваны аўдыёзапіс.

Контрвыведка Службы бяспекі Украіны сабрала дадатковыя матэрыялы, якія сведчаць, што палкоўнік ФСБ РФ Ігар Ягораў, які мае дачыненне да вярбоўкі падазраванага ў дзяржаўнай здрадзе генерал-маёра Службы бяспекі Украіны Валерыя Шайтанава, быў адным з арганізатараў акупацыі і разгортвання тэрарыстычнай дзейнасці на Данбасе. Пра гэта паведамляе прэс-служба СБУ.

"З лета 2014 года Ягораў пад пазыўным Эльбрус наўпрост каардынаваў дзейнасць незаконных узброеных фармаванняў на тэрыторыі Луганскай вобласці, даводзіў да баевікоў указанні расейскага камандавання і арганізоўваў узаемадзеянне розных груповак. Палкоўнік ФСБ называў сябе "першым намеснікам камандзіра" войскаў так званай "Наваросіі". Важным аспектам ягонай дзейнасці было ўзгадненне супольных дзеянняў з так званым "міністэрствам абароны ДНР", забеспячэнне баевікоў узбраеннем і боепрыпасамі", - гаворыцца ў паведамленні.

Са звестак украінскай спецслужбы, Ягораў асабіста прысутнічаў на акупаванай тэрыторыі, перанакіроўваў групы прарасейскіх баевікоў з Крыма на Данбас.

Акрамя таго, контрвыведка СБУ зафіксавала, што Ягораў быў непасрэдна датычны да катастрофы ўкраінскіх вайсковых самалётаў летам 2014 года і да ракетнага абстрэлу падраздзяленняў Узброеных сіл Украіны. Ён займаўся зборам выведвальнай інфармацыі і каардынаваў дыверсійныя групы для процідзеяння украінскім вайскоўцам.

СБУ апублікавала аўдыё размоў Ягорава, у тым ліку з палкоўнікам Федэральнай службы аховы прэзідэнта РФ Юрыем Котавым, у якой ён распавядае пра збіты ўкраінскі Су-25 і намякае на сваё дачыненне да падзеяў у Зяленаполлі Луганскай вобласці ў ліпені 2014 года.

Потым у размове з неўсталяванай асобай ён расказвае пра тры збітыя "Сушкі" і Ан-24.

Шайтанава, якога падазраюць у дзяржаўнай здрадзе і падрыхтоўцы тэрарыстычных актаў, затрымалі 14 красавіка. 15 красавіка Шаўчэнкаўскі райсуд Кіева арыштаваў генерал-маёра. 16 красавіка ў СБУ паведамілі пра затрыманне магчымага змоўшчыка Шайтанава, таксама супрацоўніка спецслужбаў.

У СБУ заяўлялі, што Шайтанаў, якога курыраваў палкоўнік ФСБ Ягораў, рыхтаваў забойства ўдзельніка АТА Адама Асмаева.

Следчыя Bellingcat усталявалі, што Ягораў можа быць датычны да забойства чачэнскага палявога камандзіра Зелімхана Хангашвілі ў Нямеччыне, спробы дзяржаўнага перавароту ў Чарнагорыі, катастрофы рэйса MH17 на Данбасе, анэксіі Крыма і вайны на Данбасе.