САЗ зафіксавала новы антырэкорд што да каранавіруса
1- 5.07.2020, 16:55
- 16,725
За мінулыя 24 гадзіны ў свеце зарэгістравалі 212 326 выпадкаў інфікавання.
Сусветная арганізацыя аховы здароўя (САЗ) паведаміла аб рэкорднай колькасці пацверджаных выпадкаў заражэння COVID-19 за дзень. За мінулыя 24 гадзіны ў свеце зарэгістравалі 212 326 выпадкаў інфікавання. Значная частка новых выпадкаў каранавіруса прыпадае на Злучаныя Штаты, Бразілію і Індыю, піша «Крым.Реалии».
Папярэдні рэкорд - 189 077 выпадкаў - быў зафіксаваны 28 чэрвеня.
Статыстыка смяротнасці заставалася адносна стабільнай. За дзень было зарэгістравана блізу пяць тысяч смяротных выпадкаў ад COVID-19.
У свеце каранавірусам заразіліся звыш 11,2 мільёна чалавек. Больш за 530 тысяч пацыентаў памерлі, паводле звестак Універсітэта Джонса Хопкінса, які базуецца ў ЗША. Колькасць выпадкаў заражэння імкліва расце ў Лацінскай Амерыцы, дзе гарачым пунктам застаецца Бразілія. У Паўднёвай Афрыцы, Індыі і некаторых частках Японіі апошнім часам назіраецца павелічэнне колькасці выпадкаў інфікавання.
Нагадаем, каранавірус SARS-CoV-2, раней вядомы як 2019-nCoV, выявілі ў Кітаі ў канцы 2019 года.
Ён выклікае захворванні COVID-19. У некаторых выпадках цячэнне хваробы лёгкае, у іншых - з сімптомамі прастуды і грыпу, у тым ліку з высокай тэмпературай і кашлем. Гэта можа перарасці ў пнеўманію са смяротным вынікам.
11 сакавіка 2020 года Сусветная арганізацыя аховы здароўя прызнала выбліск захворвання, выкліканага новым каранавірусам, пандэміяй.