З'явілася відэа масавай бойкі са стральбой у цэнтры Кіева

Сталі вядомыя падрабязнасці канфлікту.

Каля гандлёвага цэнтра на вуліцы Басейнай у цэнтры Кіева адбылася масавая бойка са стральбой, у выніку якой пацярпелі тры чалавекі, паведамляе unian.net.

Як паведамляе прэс-служба сталічнай паліцыі, 10 чалавек для высвятлення ўсіх абставінаў здарэння даставілі ў Пячэрскую ўправу паліцыі.

«Сёння раніцай у паліцыю паступіла паведамленне, што на тэрыторыі летняй пляцоўкі паблізу гандлёвага цэнтра на вуліцы Басейнай адбываецца бойка і чуваць стрэлы. На паказаны адрас цягам першых некалькіх хвілінаў прыбылі 7 экіпажаў патрульных і следча-аператыўная група раённай управы паліцыі», – гаворыцца ў паведамленні.

Папярэдне вызначана, што паміж дзвюма кампаніямі паўстаў канфлікт, які перарос у бойку, падчас якой адзін з удзельнікаў дастаў зброю і зрабіў некалькі стрэлаў. У выніку інцыдэнту адзін з удзельнікаў атрымаў кулявое раненне нагі, лекары яму дапамаглі на месцы здарэння.

Акрамя таго, два ўдзельнікі атрымалі нажавыя раненні і былі шпіталізаваныя ў медыцынскія ўстановы. Для высвятлення ўсіх абставінаў здарэння ў Пячэрскую ўправу паліцыі даставілі 10 чалавек.

З месца здарэння эксперты канфіскавалі стартавы пісталет і гільзу, якія надалей будуць накіраваныя на экспертызу. Следчы аддзел Пячэрскай управы паліцыі пачаў крымінальную вытворчасць паводле ч. 4 арт. 296 (хуліганства) Крымінальнага кодэкса Украіны.