Прэзідэнта Літвы заклікалі ўвесці санкцыі супраць рэжыму Лукашэнкі
7- 3.07.2020, 14:05
- 38,637
Беларусам вельмі патрэбная міжнародная падтрымка.
Сёння беларуская дыяспара ў Літве перадала прэзідэнту Гітанасу Наўседу зварот аб увядзенні санкцый супраць рэжыму Лукашэнкі. Пра гэта сайту Сharter97.org паведаміў адзін з лідараў беларусаў Літвы Павел Марыніч. Прыводзім тэкст звароту:
Прэзідэнту Літоўскай Рэспублікі
Яго правасхадзіцельству Гітанаcу Наўседу
Ваша правасхадзіцельства Спадар Прэзідэнт
Мы беларусы Літвы звяртаемся да Вас з просьбай падтрымкі.
У Беларусі сёння Лукашэнка, які незаконна займае пасаду кіраўніка дзяржавы, развязаў рэпрэсіі супраць народа. Імкнучыся ўсімі сіламі ўтрымаць уладу, узурпатар пазбаўляецца ад сваіх апанентаў, кідаючы іх у турмы і фабрыкуючы супраць іх крымінальныя справы. Усё гэта адбываецца ў перыяд так званых выбараў, якія ў Беларусі ўжо даўно сталі фарсам.
Краіна апынулася сёння ў сітуацыі прававога беззаконня, знішчаюцца апошнія астраўкі асноўных свабодаў. Кандыдаты ў прэзідэнты і чальцы іх каманд, лідары апазіцыі, актывісты і блогеры, якія апынуліся ў турмах, зазнаюць катаванні, утрымліваюцца ў жудасных умовах, якія зневажаюць чалавечую годнасць. Паводле ацэнак, сёння прынамсі 45 чалавек пасаджаныя ў турму паводле палітычных матываў. Улады выкарыстоўваюць неапраўданы гвалт у дачыненні да грамадзян і свядома імкнуцца да яго эскалацыі.
Беларускі і літоўскі народ звязвае шматвекавую агульную гісторыю, культуру, сяброўства і добрасуседства. Мы заўсёды шанавалі дапамогу Літоўскай Рэспублікі ў імкненні беларусаў да незалежнасці, свабоды і дэмакратыі. За гэта Вам вялікі дзякуй!
Сёння нам вельмі патрэбная міжнародная падтрымка, Ваша ўвага да нашай сітуацыі і прынцыповая пазіцыя што да масавых парушэнняў правоў чалавека. Вы можаце істотна дапамагчы спыніць гвалт у дачыненні да мірных грамадзян у Беларусі.
Заклікаем вас:
Запатрабаваць неадкладнага вызвалення ўсіх затрыманых паводле палітычных матываў і расследаваць усе выпадкі ўжывання да іх катаванняў
Запатрабаваць спыніць адвольныя затрыманні мірных грамадзян і забяспечыць у Беларусі свабоду слова і сходаў
Запатрабаваць спыніць практыку выкарыстання неапраўданай і залішняй сілы супраць мірных сходаў грамадзян
Запатрабаваць забяспечыць умовы для бесперашкоднай работы незалежнай прэсы
Запатрабаваць неадкладна спыніць блакаванне ў Беларусі незалежных электронных медыяў
Падтрымку грамадзянскай супольнасці ў Беларусі як адзін з найважнейшых элементаў беларускага суверэнітэту і ўстойлівасці, заклікаць кіраўніцтва Беларусі не абмяжоўваць рэгістрацыю НДА і не перашкаджаць іх дзейнасці (у тым ліку зняцце блакады краўдфандынгавых платформаў, такіх як MolaMola);
Заклікаць вярнуць народу Беларусі вольныя выбары, без якіх краіну чакае востры эканамічны і палітычны крызіс
Спыніць палітычную падтрымку рэжыму і кантакты высокага ўзроўню
Спыніць ўсякую фінансавую дапамогу дзяржаўным органам
Спыніць гандлёвыя стасункі з дзяржаўнымі прадпрыемствамі.
Максімальна скараціць і абмежаваць банкаўскія і фінансавыя аперацыі з дзяржаўнымі контрагентамі.
Ужыць захады для замарожвання перамоваў з Беларуссю ў пытаннях, якія цікавяць улады
Публічна падтрымаць рэпрэсаваных грамадзян Беларусі
Узначаліць на ўзроўні ЕЗ аднаўленне санкцый супраць беларускіх чыноўнікаў, адказных за рэпрэсіі і пераслед;
Дамагацца еўрапейскай салідарнасці ў дачыненні да закрыцця небяспечнага праекта Астравецкай АЭС і ўжыць усе захады для забеспячэння таго, каб электраэнэргія, якая выпрацоўваецца станцыяй, не выходзіла на рынак ЕЗ.
Беларусы Літвы. 3 ліпеня 2020, Вільня.