Вярхоўная Рада Украіны прыняла закон аб легалізацыі гульнявога бізнэсу

Законапраект у другім чытанні агулам падтрымала 248 народных дэпутатаў.

На пасяджэнні 14 ліпеня Вярхоўная Рада прыняла закон аб легалізацыі гульнявога бізнесу, піша gordonua.com.

За адпаведны праект закон №2285-д у другім чытанні аддалі свае галасы 248 дэпутатаў пры мінімальна патрэбе 226. Падтрымалі законапраект 224 дэпутаты з фракцыі "Слугі народа", 18 - з групы "Довіра", чацвёра - з групы "Партыя" за майбутнє" і двое пазафракцыйныя. "Апазіцыйная платформа - за жыццё", "Еўрапейская салідарнасць", "Бацькаўшчына" і "Голас" не далі ніводнага голасу.

Законапраект №2285-д "Аб дзяржаўным рэгуляванні дзейнасці для арганізацыі і правядзення азартных гульняў" зарэгістравалі ў парламенце 18 снежня 2019 года, 16 студзеня 2020 года дэпутаты прынялі яго ў першым чытанні. У другім чытанні Рада пачала разглядаць законапраект 30 чэрвеня. Да яго дадалі амаль 3,5 тысячы правак.

У тлумачальнай нататцы да законапраекта №2285-д сказана, што яго мэтай з'яўляецца стварэнне сучаснай і эфектыўнай нарматыўна-прававой базы для арганізацыі і правядзення азартных гульняў ва Украіне. Аўтары законапраекта адзначылі, што пасля забароны гульнявога бізнэсу ва Украіне ў 2009 годзе дзяржбюджэт штогод страчваў больш за 10 млрд грн.

Законапраект прадугледжвае стварэнне ва Украіне асобнага рэгулятара рынку - Камісіі для рэгулявання азартных гульняў і латарэй, якая будзе выдаваць ліцэнзіі арганізатарам азартных гульняў. Імі змогуць стаць выключна юрыдычныя асобы - рэзідэнты Украіны.

У законапраекце прапісаны патрабаванні да дзейнасці казіно, букмекерскіх кантор і гульнявых залаў. Напрыклад, згодна з тэкстам законапраекта, гульнявыя аўтаматы можна будзе ўсталяваць у гатэлях стандарту "тры зоркі" і вышэй, а казіно - у пяцізоркавых гатэлях і ў спецыяльнай гульнявой зоне, якая можа быць створана паводле пастановы Кабінета Міністраў.

Гуляць у азартныя гульні ва Украіне змогуць асобы, якія дасягнулі 21-гадовага ўзросту.