Гандбаліст Андрэй Клімовец: Беларусь саспела для перамен

Калі ў камандзе нелады, то перш за ўсё мяняюць трэнера.

У інтэрв'ю tribuna.com вядомы беларускі гандбаліст Андрэй Клімовец, які пражывае ў Нямеччыне, і які працуе там трэнерам, на пытанне, ці сочыць ён за падзеямі ў Беларусі напярэдадні прэзідэнцкіх выбараў, адказаў, так.

- Вядома. Імкнуся быць у курсе ўсіх падзей, чытаю інфармацыйныя сайты.

- І што пры гэтым думаеце?

- Напэўна, пара нешта мяняць. Думаю, Беларусь для змен саспела.

Правяду аналогію са спортам. Не ведаю ніводнага трэнера, які паспяхова кіраваў бы камандай больш за дзесяць гадоў. І калі ў камандзе нелады, то перш за ўсё мяняюць трэнера, а не ўсю каманду, - сказаў Клімовец.

У сярэдзіне «нулявых» Клімовец стаў грамадзянінам Нямеччыны і ў 2007-м у складзе яе каманды перамог у чэмпіянаце свету. Па заканчэнні кар'еры гульца Андрэй Клімовец трэніраваў «Пфорцхайм» з трэцяй лігі. Узяўшы ў 2019-м гадавы перапынак, ён ізноў узначаліў каманду з зямлі Бадэн-Вюртэмбэрг у пачатку гэтага года.