Беларусь ужо не будзе ранейшай

Працэс змены ўлады пайшоў.

Лідар прафзвязу РЭП Генадзь Фядыніч пракаментаваў «Рабочай Салідарнасці» небывалую актыўнасць выбарцаў падчас прэзідэнцкай кампаніі, піша praca-by.info.

- Тое, што беларусы цяпер хочуць паставіць подпісы за каго хочаце, толькі не за Лукашэнку, не толькі абурае ўладу. Гэта яе палохае. Гэта сапраўдная пагроза для той улады, якая сфармавалася за апошнюю чвэрць стагоддзя. Простыя людзі, не актывісты, у свой выходны дзень у масках гатовыя стаяць у чарзе, каб выказаць сваё стаўленне да гэтай улады. Такога яшчэ не было.

Зразумела, ідуць размовы, спрэчкі. Але гэта не мітынг, не спланаваная акцыя. Гэта натуральная рэакцыя грамадзян на тое, што адбываецца ў нас у краіне. У іх прачынаецца не толькі пачуццё незадаволенасці, але і пачуццё годнасці, пачуццё адказнасці за сябе, за сваіх дзяцей, за Радзіму. Яны ставяць подпісы за перамены.

Я мяркуе, што Беларусь ужо не будзе ранейшай, ужо нейкая рыса пройдзеная. І позна ўжо палохаць рэпрэсіямі. Гэта створыць яшчэ больш праблем для самой улады, штурхае яе на шлях недаравальных злачынстваў.

Асаблівасць цяперашняй сітуацыі ў тым, што яе стварыла не апазіцыя, не альтэрнатыўныя кандыдаты. Па-сутнасці, яе стварыла сама ўлада. Лідары, якіх праз розныя «праймерыз» спрабавалі абраць апазіцыйныя структуры, пачалі стварацца ў народзе. Невядома, ці будуць гэта сённяшнія кандыдаты, або іншыя асобы, пра якіх мы яшчэ нават не чулі, гэтыя лідары ўжо фармуюцца ў нетрах грамадства.

Магчыма, што ніхто з альтэрнатыўных кандыдатаў не будзе зарэгістраваны, што самі гэтыя «выбары» нічога не зменяць, бо мы ўсе ведаем, як іх робяць. Паглядзім на сітуацыю, што будзе лепей, - удзел ці татальнае ігнараванне. Але працэс змены ўлады ўжо пайшоў, і гэта адчуваюць усе ў грамадстве, у тым ліку тыя, хто «наверсе». Ад усіх нас будзе залежаць, якімі будуць перамены, у які бок рушыць краіна. Абыякавасць, неабачлівасць, дробная амбітнасць могуць завесці ў пастку, з якой не будзе выйсця. Але я веру ў наш народ, у Беларусь.