Расейскі музыкант Сяргей Шнураў стаў генеральным прадусарам тэлеканала RTVI

Новы генеральны прадусар зоймецца стварэннем і прасоўваннем ненавінавых прадуктаў.

Франтмэн расейскага рок-гурту "Ленінград", актор, прадусар і палітык Сяргей Шнураў стаў генеральным прадусарам міжнароднага расейскамоўнага тэлеканала RTVI. Пра гэта тэлекампанія паведаміла на сваім сайце 29 чэрвеня.

"Разам з суполкай канала ён будзе працаваць над галоўнай задачай холдынгу - аб'яднаннем мільёнаў расейскамоўных людзей ва ўсім свеце праз агульны культурны канцэпт", - гаворыцца ў паведамленні.

Прапанова Шнураву зрабіў ўладальнік RTVI Мікаэл Ісраэлян.

"Мы вывучылі найлепшыя практыкі і прынялі пастанову стварыць новую пасаду, прапанаваўшы супрацоўніцтва менавіта Сяргею, даўно вядомаму як у Расеі, так і за мяжой. Сяргей часта наведвае краіны з высокай канцэнтрацыяй расейскамоўнага насельніцтва і выдатна разумее менталітэт тых, хто жыве за мяжой. Мы ўпэўнены: з прыходам Сяргея RTVI зможа здабыць сваю новую унікальную інтанацыю і арыгінальнае змястоўнае аблічча", - пракаментаваў кадравыя змены Ісраэлян.

"На працягу ўсяго жыцця я працую з зборным вобразам расейскага чалавека, тэма нашага асобнага светапогляду была заўсёды ў цэнтры маёй увагі. У сваёй творчасці я імкнуўся захаваць сувязь паміж носьбітамі нашай культуры і мовы. Далучыўшыся да суполкі RTVI, я планую развіваць пляцоўку для абмеркавання ўсіх самых вострых і актуальных пытанняў міжнароднага парадку, якія наўпрост уплываюць на жыццё суайчыннікаў ва ўсім свеце", - падае сайт словы Шнурава.

Мяркуецца, што новы генеральны прадусар зоймецца стварэннем і прасоўваннем ненавінавых прадуктаў, абнаўленнем і прасоўваннем маркі канала, будзе фармаваць агульную крэатыўную стратэгію развіцця і сетку вяшчання.

RTVI вяшчае ў 53 краінах свету.