Улады Беларусі ўвялі новы збор паводле дэкрэту аб дармаедстве

«Саша 3 адсоткі» вырашыў яшчэ садраць грошай з беспрацоўных беларусаў.

Беларусам, якія анлайн хочуць даведацца, ці не ўнеслі іх у базу не занятага ў эканоміцы насельніцтва, цяпер трэба заплаціць. Раней паслуга падавалася на Адзіным партале электронных паслуг бясплатна. Заплаціць давядзецца і за падаванне інфармацыі, ці не залічылі вас да тых, хто павінен поўнымі тарыфамі аплачваць некаторыя ЖКП, паведамляе tut.by.

З 1 снежня 2018 гада ў Беларусі запусцілі базу звестак працаздольных грамадзян, якія не занятыя ў эканоміцы. З гэтай даты беларусы могуць анлайн праверыць, ці не ўключылі іх у базу дармаедаў, - на Адзіным партале электронных паслуг. Гэтая паслуга была бясплатнай. Аднак цяпер карыстальнікі звярнулі ўвагу, што цяпер яе падаюць за грошы.

У Нацыянальным цэнтры электронных паслуг распавялі, што паслуга 3.33.03.2 «падача звестак аб аднясенні працаздольнага грамадзяніна да незанятых у эканоміцы» стала платнай з сакавіка сёлета. Тарыф - 0,42 рубля за адзін заказ. «Паслуга выдаецца фізічным асобам паводле перадаплаты. У момант атрымання паслугі будзе выстаўлены нумар заказу для аплаты ў АРІП, - удакладнілі ў НЦЭУ. - Для атрымання доступу да паслугі неабходна накіроўваць заяўку, заключаецца дамова, аплата за паслугу праходзіць па штомесячным актам выкананых работ». У НЦЭУ ўдакладнілі, што атрымліваць паслугу могуць грамадзяне ў адносінах да сябе асабіста.

Заплаціць 0,42 рубля таксама давядзецца за інфармацыю, ці ўключылі вас паводле дармаедскага дэкрэту да тых, хто павінен аплачваць некаторыя ЖКП поўным тарыфам. Код гэтай паслугі - 3.33.04.2.