У Італіі запусцілі мабільнае прыкладанне супраць каранавіруса

Immuni дапаможа адсочваць магчымыя кантакты з інфікаванымі COVID-19.

Нягледзячы на пратэсты абаронцаў асабістых звестак, Італія запусціла спецыяльнае мабільнае прыкладанне для сачэння за кантактамі з інфікаванымі каранавірусам SARS-CoV-2. Сэрвіс Immuni, які базуецца на тэхналогіі Bluetooth, можа быць запампаваны на смартфоны, паведаміла вечарам у панядзелак, 1 чэрвеня, міністэрства аховы здароўя ў Рыме, піша «Нямецкая хваля».

З 8 чэрвеня будуць актываваныя ўсе функцыі прыкладання. На першым этапе яно будзе працаваць толькі ў чатырох з 20 абласцей Італіі - Абруца, Апуліі, Лігурыі і Марка. Пазней плануецца падключыць і іншыя рэгіёны. З дапамогай праграмы ўлады спадзяюцца больш дакладна адсочваць і перарываць ланцужкі заражэння каранавірусам. Дадатак Immuni будзе спампоўвацца на добраахвотнай аснове.

У адпаведнасці з заканадаўствам Італіі і ЕЗ

Аднак прыкладанне крытыкуюць экспэрты ў галіне абароны асабістых звестак, якія папярэджваюць аб магчымасці злоўжыванняў. Улады Італіі ў сваю чаргу запэўнілі, што праграма была створаная ў поўнай адпаведнасці з італійскім і еўрапейскім заканадаўствам у гэтай сферы.

Аналагічныя прыкладанні маюць намер запусціць (ці ўжо зрабілі гэта) многія іншыя краіны. 27 траўня Нацыянальны сход Францыі ўхваліў выкарыстанне мабільнага прыкладання StopCovid, якое будзе адзначаць перасоўванне ўладальнікаў смартфонаў і апавяшчаць іх аб кантакце з чалавекам, інфікаваным вірусам SARS-CoV-2. У Нямеччыне магчымасць увядзення папераджальнага мабільнага прыкладання абмяркоўваецца з сакавіка. Такую праграму на даручэнне ўрада ФРГ распрацоўваюць кампаніі Deutsche Telekom і SAP.