Успышка COVID-19 у Менскай вобласці: На БелАЗе ў Жодзіне памерла шмат людзей
- 30.05.2020, 11:51
- 27,769
Жыхары рэгіёну паведамілі шакавальныя звесткі пра новыя асяродкі інфекцыі.
Чытачы пішуць пра новыя асяродкі Covid-19 у Менскай вобласці. Заражэнне распаўсюджваецца ў Жодзіне, Слуцку, Стоўбцах, Нясвіжы, Крупках, паведамляе тэлеграм-канал «Баста!».
«У Жодзіне на БелАЗе многія хварэюць. І на заводзе памерла шмат людзей», – піша чытач.
«Дачка вучыцца ў Слуцку ў медкаледжы. Там дзеецца нейкі кашмар. Частка дзяцей хварэе, а астатнім, кантактным – мазкі ніхто не бярэ.
Заяву на індывідуальнае навучанне напісаць не даюць, палохаюць адлічэннем. Тых, хто паспрабаваў паспрачацца з адміністрацыяй, прэсуюць і запалохваюць. Гэта жах. Тэлефанавалі бацькі ў каледж і ў санстанцыю, усім пляваць», – паведамляе падпісант.
«Слуцк. Працую на хуткай дапамозе. За змену 20–30 з пацверджаным "кавідам", развозяць па розных гарадах. Хлопцаў з кадэцкай вучэльні звозім у Капыль», – піша чытач.
«Ляжу ў лякарні ў Стоўбцах, кожныя 5 хвілінаў прывозяць, палаты ўсе забітыя і людзі ў калідорах нават ляжаць», – паведамляе жыхар горада.
«Нясвіж. У нас уся лякарня заваленая хворымі з пнеўманіяй, ва ўсіх аддзяленнях ужо ляжаць», – піша чытач.
«Крупкі, школа №1. Ёсць пацверджаны дыягназ каранавірусу. Настаўніца кантактная знаходзіцца дома, узялі тэст. Муж настаўніцы, супрацоўнік трансгазу дома з учорашняга дня, самаізаляцыя», – паведамляе падпісант.
Сцягвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Баста» і стварайце гісторыю свабоднай Беларусі.