У Польшчы колькасць інфіцыраваных каранавірусам перавысіла 5 тысяч
- 8.04.2020, 21:35
- 13,585
Памерлі 159 чалавек.
Як паведаміла Міністэрства аховы здароўя Польшчы, у краіне адзначана 5205 чалавек інфіцыраваных каранавірусам SARS-CoV-2, які выклікае хваробу COVID-19. Памерлі 159 чалавек, паведамляе «Радио Польша».
Галоўны санітарны інспектар Польшчы Ян Боднар адзначыў, што, згодна з навуковымі звесткамі, курэнне павышае рызыку развіцця COVID-19 нават у 14 разоў.
Дабрачынная арганізацыя Caritas Polska сабрала 20 мільёнаў злотых (4, 35 млн еўраў) для пажылых людзей і медыцынскага персаналу. Добраахвотнікі Caritas Polska кожны дзень дастаўляюць харчовыя пасылкі тысячам асобам, якія жывуць у нястачы, бяздомным і хворым людзям па ўсёй Польшчы. Caritas Polska купляе таксама рэспіратары і самае неабходнае абсталяванне для польскіх бальніц.
Права на дапамогу па хваробе даецца не толькі асобе, што змяшчаецца ў карантын пасля вяртання з-за мяжы, але і яе сужыцелям, - нагадалі ва Упраўленні сацыяльнага страхавання Польшчы. Для гэтага асобы, якія вяртаюцца з-за мяжы, павінны падаць звесткі пра людзей, якія пражываюць з імі, у Дзяржаўную санітарную інспекцыю.