Дачка памерлай медсястры: У складанай сітуацыі дзяржава не паклапацілася пра медыкаў

У Святланы Кісялёвай засталося двое дзяцей.

У пятніцу ўдзень з'явілася інфармацыя, што ў Віцебску за дзень памерлі два чалавекі. Адна з іх медработніца. Жанчыну клікалі Святлана Кісялёва. Ёй было 47 гадоў. Яна працавала медсястрой у Віцебскай гарадской клінічнай бальніцы №1. У Святланы засталося двое дзяцей. Анастасія, якой 27, і 7-гадовая Вераніка.

У народзе Віцебскую гарадскую клінічную бальніцу №1 называюць «трэстаўскай». Тут, кажа дачка медсястры Анастасія Кісялёва, яе мама прапрацавала больш за 20 гадоў.

- Мама працавала ў неўралогіі, - распавядае tut.by Насця. - Дзесьці 13 сакавіка пацыентаў, якія тут ляжалі, сталі выпісваць. Сказалі будуць завозіць сюды ВРВІ і пнеўманію. Пры гэтым, адразу ніякіх спецыяльных халатаў або акуляраў медыкам не выдавалі. Толькі 15 грамаў спірту, якімі пасля працы яны апрацоўвалі рукі. І гэта ўся абарона! Дома ў нас былі рэспіратары, мама брала іх на працу. Казала, што некаторыя медсёстры для абароны ўкладвалі ў аднаразовыя маскі штодзённыя пракладкі, прасякнутыя настойкай пропалісу.

Спачатку, працягвае суразмоўца, новыя пацыенты занялі прыкладна паўтара аддзялення. У неўралогіі, дзе працавала Святлана, іх не было. Але медсясцёр адсюль, успамінае Насця, выклікалі на падмогу калегам. Колькі менавіта мама была на падмозе, дачка не памятае.

- Кожныя выхадныя мама брала дадому памыць сваю працоўную форму, - успамінае дачка. - Пасля таго, як у іх у лякарні памерла 58-гадовая пацыентка (Міністэрства аховы здароўя паведаміла, што тэкст на каранавірус у яе паказаў адмоўны вынік. - Заўвага.), ёй і іншым медсёстрам было страшна несці дадому сваю форму. Тады старэйшая медсястра параіла калегам спачатку замачыць усё ў хлорцы, і так везці.

Удзень 24 сакавіка на працы ў Святланы паднялася тэмпература - 37,3, і яе адправілі на бальнічны. На бальнічным, адзначае дачка, мама прабыла недзе тыдзень. Лепш не станавілася, яна папрасіла зрабіць здымак. Праз дзве гадзіны пасля гэтага, успамінае Насця, маме паведамілі, што ў яе пнеўманія і трэба класціся ў бальніцу.

У панядзелак, 30 сакавіка, яе шпіталізавалі ў сваю ж Віцебскую гарадскую клінічную бальніцу №1.

- Яна мне сказала, што дыягназ у яе быў двухбаковая бронхапнеўманія. Калі я ў яе спытала, дзе яна магла заразіцца, яна адказала: «На працы», - вяртаецца да тых падзей дачка. - Пакуль мама ляжала ў бальніцы, мы размаўлялі кожны дзень. Я ў яе тады пыталася: «Вашу бальніцу нарэшце апранулі?» Яна адказала: «Так, ходзяць як снегавікі, далі аднаразовыя «папяровыя» халаты.

Са слоў дачкі, тэмпературу маме збівалі ўколамі. Акрамя таго, ёй капалі моцныя антыбіётыкі, ад якіх, успамінае дачка, Святлану ванітавала.

- У чацвер вечарам яна мне напісала, што ў яе адыходзіць макрота. Гэта, сказала, добра, але адчувала яна сябе дрэнна. Скардзілася на антыбіётык. Але ёй сказалі, калі тэмпература не будзе прыходзіць у норму, лекі заменяць... У пятніцу ўначы нам паведамілі, што яна памерла.

У даведцы, якую выдалі сям'і пасля ўскрыцця, напісана, што прычына смерці Святланы: «вострая рэспіраторная недастатковасць».

- Ёй рабілі тэст на каранавірус?

- Так, у аўторак, але вынікаў нам ніхто не паведамляў. У графе «Паталагічныя станы (захворванні), якія выклікалі або якія абумовілі непасрэдную прычыну смерці», напісана «не ўдакладненыя». Лекар нам сказаў, гэта пра каранавірус.

У пятніцу, 3 красавіка, падчас абласнога штаба ў барацьбе з распаўсюджваннем каранавіруса, намеснік начальніка Віцебскага ўпраўлення аховы здароўя Мікалай Каспіровіч, не называючы прозвішчы, паведаміў пра смерць медработніка. Жанчына, сказаў ён, лячылася ад цяжкай двухбаковай пнеўманіі вірусна-бактэрыяльнага генезу. Пакуль няма пацверджаных вынікаў наяўнасці РНК каранавіруса, адзначыў прадстаўнік ўпраўлення аховы здароўя.

- Да гэтай сітуацыі ваша мама чымсьці хварэла?

- Ніякіх захворванняў, звязаных з лёгкімі, у яе не было.

У пятніцу вечарам, кажа Наста, яе айчыма з тэмпературай 39 забралі ў бальніцу. Сказалі, працягвае яна, што ў яго ВРВІ. Яму зрабілі тэкст на каранавірус.

- Мне перадалі мамін тэлефон. Апоўначы перад смерцю яна пісала, што папрасіла перавесці яе ў рэанімацыю, але перавялі яе толькі да 2 гадзін ночы. Дзе гэтыя дзве гадзіны былі лекары? - не стрымлівае эмоцый дзяўчына. - Мама вельмі любіла медыцыну і сваю справу. Яна ўсё жыццё працавала ў адной лякарні, але ў цяжкай сітуацыі дзяржава не паклапацілася пра медыкаў. Медработніца памерла. Мая 7-гадовая сястра засталася без мамы.