Жыхар Баранавічаў пра свой карантын у інфекцыйнай лякарні: Спачатку падумаў, што гэта жарт

Мужчына з'ездзіў па справах у Менск на маршрутцы, а ўжо праз некалькі дзён апынуўся на карантыне.

Ілля з'ездзіў па справах у Менск на маршрутцы, а ўжо праз некалькі дзён, 2 красавіка, апынуўся на карантыне ў інфекцыйным аддзяленні Баранавіцкай гарадской лякарні. Мужчына распавёў Intex-press аб тым, як здарылася, што ён стаў кантактам першага ўзроўню, і як арганізаваны яго карантын.

У суботу, 28 сакавіка, а 6-й раніцы з баранавіцкага аўтавакзала Ілля адправіўся на маршрутцы ў Менск па працоўных справах. Увечары ў той жа дзень яму патэлефанавалі з Баранавіцкага ЗЦГіЭ і папрасілі заставацца дома, бо ён ехаў у маршрутцы з чалавекам, у якога можа быць каранавірус. Ілля спачатку падумаў, што гэта чыйсьці жарт.

- А калі ў той жа дзень я ўжо ехаў з Менска дадому ў Баранавічы, мне зноў патэлефанавалі са санстанцыі і сказалі: «Вы толькі ў маршрутцы не едзьце», - распавёў Intex-press Ілля.- А я ўжо быў у ёй, тым больш дадому ж трэба было неяк дабрацца.

Чатыры дні мужчына знаходзіўся на самаізаляцыі дома, а раніцай 2 красавіка яму зноў патэлефанавалі і да 12.00 сказалі чакаць лекара.

- Лекар прыехаў, удакладніў яшчэ раз мае звесткі, спытаў, на якой я ехаў маршрутцы: 25 або 28 сакавіка, - распавядае Ілля. - Гэта значыць, атрымліваецца, што не адна наша маршрутка была такая.

Мужчыну сказалі сабраць да 16 гадзін рэчы і чакаць машыну хуткай дапамогі, якая прыедзе забраць яго на карантын.

- Нейкай панікі або страху ў мяне не было, бо ўсе гэтыя дні я адчуваў сябе нармальна, - кажа Ілля. - Да чатырох гадзін да мяне дадому прыехалі лекары ў скафандрах, масках, пальчатках і без якіх-небудзь боксаў на машыне хуткай дапамогі мяне павезлі ў наш скурна-венералагічны дыспансер.

Там, са слоў мужчыны, яму тры разы вымералі тэмпературу, якая паказала 37,2, і павезлі на 14-дзённы карантын у інфекцыйнае аддзяленне Баранавіцкай гарадской лякарні. Аналізы ў яго ўзялі на наступны дзень, але пра якія-небудзь вынікі яшчэ не казалі.

- Сёння ўзялі аналіз мачы, кроў з вены і мазок з носу і горла. Усё, больш нічога, - распавядае Ілля. - Сказалі паласкаць горла фурацылінам і прапісалі парацэтамол і нейкія чырвона-белыя таблеткі. Што за яны, не ведаю, бо прыносяць паштучна.

У палаце на чатыры месцы мужчына ляжыць адзін, і для яго ўсё, што адбываецца цяпер, у навінку.

- У лякарню я трапіў упершыню, - кажа Ілля. - Лекары наогул мала што кажуць і баяцца гутарыць. На ўсе мае пытанні я толькі і чую «чакайце, чакайце, чакайце».

Пакой, у якім знаходзіцца, мужчына называе ізаляваным боксам: у ім ёсць халадзільнік, туалет і душ, ракавіна з вадкім мылам і падвойныя дзверы, праз якія яму выходзіць куды-небудзь строга забаронена.

- Нязвыкла знаходзіцца ў такім становішчы, - кажа Ілля. - Сёння першы раз пакармілі, і ежа тут, на мой густ, не вельмі: проса без солі, яйка, кавалачак батона і паўконаўкі гарбаты, здаецца, заваранай адным пакуначкам на ўвесь імбрык. Добра, што я хоць якога печыва і вафляў узяў з сабой.

Пасля інцыдэнту ў маршрутцы Ілля кантактаваў толькі з калегамі ў Менску. Калі на працы даведаліся, што яго закрылі на карантын, то ўсе спалохаліся.

- Мае калегі сталі панікаваць і казаць мне: «Нас усіх закрыюць!» - уздыхае мужчына. - Але прайшло ўжо пару дзён, а нікога з іх дагэтуль не праверылі і нікуды не забралі. Так і працуюць далей. Дзякуй Богу, што я ў гэтыя дні не размаўляў ні з кім з родных і жыву асобна.

Мужчына кажа, што знаходзіцца ў шпіталі ў поўнай ізаляцыі складана: бракуе жывых стасункаў і палохаюць паводзіны лекараў, якія яму «пакуль нічога не кажуць».

- Сёння раніцай мая тэмпература ўжо ў норме - 36,6. Адчуваю сябе добра, - кажа Ілля. - Я проста ляжу ў ложку цэлы дзень, гляджу серыялы і тэлефаную родным і сябрам. Без тэлефона я б тут не выжыў і, напэўна, звар’яцеў.

Вынік тэсту на каранавірус мужчыну сказалі чакаць праз два-тры дні. І, са слоў Іллі, калі аналіз будзе адмоўны, то яго перавядуць на карантын у скурна-венералагічны дыспансер.

- А пакуль я буду тут знаходзіцца і чакаць вынікаў тэсту.