Навукоўцы распавялі, чаму каранавірус SARS-CoV2 справакаваў пандэмію

Даследчыкі стварылі 3-D карту шыпападобнага бялку віруса.

Новыя даследаванні Універсітэта Мінесоты праліваюць святло на механізм заражэння каранавірусам. Навукоўцы стварылі 3-D карту шыпападобнага бялку, які вірус выкарыстоўвае для замацавання ў клетцы, паведамляе nv.ua.

Гэта адкрыццё дазволіла нарэшце высветліць, чаму каранавірус SARS-CoV2 перадаецца значна хутчэй, чым SARS, які шмат хто з медыкаў уважае за яго «бацьку».

Амерыканскія вірусолагі правялі дэталёвы аналіз структуры каранавіруса і адзначылі, што бялковае ўтварэнне ў форме шыпа захоплівае клеткі чалавека ў чатыры разы мацней, чым SARS, які забраў жыцці некалькіх соцень людзей падчас пандэміі 2002 года.

Гэта значыць, што патрапіўшы ў дыхальныя шляхі, з вялікай доляй імавернасці вірус застанецца там. А затым выкліча Covid-19 - хваробу, якая ахапіла ўсю планету.

«Гэта тлумачыць хуткасць перадачы віруса і ўскладняе задачу яго кантролю»

Доктар Фанг Лі, які ўзначаліў каманду даследчыкаў, адзначае, што адкрыты імі механізм прымацавання віруса да клеткі чалавека больш дасканалы, чым у многіх іншых узбуджальнікаў інфекцыйных хвароб.

З іншага боку, доктар Лі адзначае, што вынікі даследавання дапамогуць у распрацоўцы вакцыны. «Калі злучэнне антыцелаў сыроваткі з шыпамі віруса будзе мацнейшым, чым у шыпоў і клетак цела чалавека, мы зможам казаць аб вынаходстве эфектыўнага прэпарата. Ён папросту блакуе вірус, перашкаджаючы яго ўздзеяння на клетку».

Таксама падчас даследавання медыкі атрымалі пацвярджэнне тэорыі, пра якую ўжо пісаў «НВ Здароўе». Яе сутнасць у тым, што чалавек атрымаў вірус ад кажана, наўпрост ці праз прамежкавых носьбітаў - пангалінаў.

Вынікі даследавання доктара Фанга Лі пракаментаваў для The Gardian Джонатан Бол, прафесар вірусалогіі Нотынгемскага ўніверсітэта. Ён адзначыў, што гэтыя звесткі таксама тлумачаць адрозненні ў сімптомах захворванняў, выкліканых двума вірусамі. SARS выяўляецца, у асноўным, лёгачнай сімптаматыкай, у той час як SARS-CoV2 паражае спачатку верхнія дыхальныя шляхі і толькі потым перарастае ў пнеўманію, і то не ва ўсіх выпадках.

«Шыпападобны бялок павярхоўнага піка SARS-CoV2 замацоўваецца адразу пры ўдыханні чалавекам вірусных кропель, а вось SARS дзейнічае больш павольна, за кошт чаго і распаўсюджваецца складаней», - мяркуе прафесар Бол.