Лукашэнка хавае праўду пра колькасць смерцяў ад каранавірусу

Беларускія медыкі паведамляюць жудасныя рэчы пра рэальнае становішча справаў.

Адзін з лідараў беларускай апазіцыі Мікола Статкевіч у інтэрв'ю «Голасу Амерыкі» расказаў, што ў грамадстве расце незадаволенасць дзеяннямі ўладаў і недавер да самога прэзідэнта. «І цяпер мы бачым, як людзі, якія працуюць у сістэме аховы здароўя, пераадольваюць страхі і паведамляюць жудасныя рэчы пра сапраўдны стан рэчаў. А Лукашэнка спрабуе грамадства супакоіць, растлумачыць, што ўсё нармальна. Гэта значыць, ягоная стратэгія, відаць, у тым, каб мы як мага хутчэй усе перахварэлі, хтосьці памёр, і гэтыя смерці можна будзе спісаць на пнеўманію. Статыстыка – у ягоных руках і колькасць смерцяў заўсёды можна прынізіць. Нават калі ад каранавірусу памрэ некалькі тысячаў чалавек, то гэтыя звесткі можна будзе схаваць», – мяркуе палітык.

Мікола Статкевіч мяркуе, што для зніжэння ўзроўню небяспекі варта было б перавесці школы і ВНУ на дыстанцыйнае навучанне, зачыніць кінатэатры і паркі адпачынку і зачыніць уезд у краіну. «Так зрабілі ўсе нашы суседзі, а мы – не. І атрымліваецца, што да нас можна прыязджаць, а мы нікуды выехаць не можам.

Але Лукашэнка дзейнічае ў рамках нейкай вар'яцкай логікі. Ён прадаўжае расхалоджваць людзей. Чым гэта скончыцца, ніхто не ведае.

Цяпер прыходзяць трывожныя сігналы, асабліва з Віцебскай вобласці. Там больш за тысячу дзвесце чалавек шпіталізаваныя з пнеўманіяй. Вось такая ў нас сітуацыя», расказвае ён.

Афіцыйную статыстыку пра колькасць захварэлых і памерлых ад каранавірусу лідар «Народнай грамады» называе хлуслівымі звесткамі. «Першы летальны выпадак, які яны (улады Беларусі – рэд.) прызналі, гэта смерць вядомага актора Віцебскага абласнога тэатра Віктара Дашкевіча. Гэта ўжо немагчыма было схаваць», – канстатуе Мікола Статкевіч. І падсумоўвае: «Інфармацыя прарываецца. Я не ведаю, як грамадства адрэагуе, калі пачнуцца масавыя смерці. А лекары, якія адважваюцца казаць праўду – і іх становіцца ўсё больш – кажуць, што ў нас будзе вельмі цяжкая сітуацыя. Мы – лідары апазіцыі – заклікаем арганізаваць народны карантын, рэкамендуем самаізаляцыю, раім не пускаць дзяцей у школу. А з другога боку, кіраўнік у тэлевізары кажа: ды выпіце гарэлкі!

І я звярнуў увагу на тое, што ў тым раёне, дзе я жыву, з'явілася нашмат больш п'яных кампаній. Многія радуюцца таму, што можна свабодна выпіць, і міліцыя цябе не кране – кіраўнік ж дазволіў, сказаўшы, што гэта лекі ад каранавірусу. І людзі не надта адукаваныя, з нізкіх сацыяльных слаёў на гэты заклік ахвотна адгукаюцца».