Літоўскі прафесар падаў новыя звесткі пра каронавірус

Які інкубацыйны перыяд, на працягу колькіх дзён можна заразіцца.

Сямейны лекар Сантарышкскай клінікі, прафесар Віленскага ўніверсітэта Вітаўтас Касюлявічус падзяліўся новымі звесткамі пра каронавірус (COVID-19). Ён абапіраецца на звесткі, сабраныя на серверы medrxiv.com.

Запіс прафесара апублікаваў сайт delfi.lt:

«Заразіцца COVID-19 можна за два-тры дні да з'яўлення сімптомаў. Магчыма, 44% пацыентаў заражаюцца менавіта ў гэты перыяд.

Інкубацыйны перыяд хваробы - 5,2 дня (гэта ўжо вядома). Вірус можа вылучацца 21 дзень (гэта пацвердзілі падчас назіранняў), але магчымасць заразіцца значна зніжаецца праз 7 дзён пасля з'яўлення сімптомаў», - піша прафесар.

Сямейны лекар валодае важнай інфармацыяй для пацыентаў - людзей, якія заразіліся каронавірусам.

«Гэта вельмі важныя звесткі. Калі ў вас быў кантакт (паводле новых звестак, пра гэты кантакт вы можаце і не ведаць), у першыя два-тры дні вы не можаце заразіць іншых, але пазней, нават калі вы самі не захварэеце, вы можаце заразіць іншых, - пісаў прафесар. - Асабліва небяспечны такі чалавек для іншых людзей за 2-3 да з'яўлення сімптомаў і потым тыдзень пасля іх з'яўлення (гэта кашаль, боль у горле, тэмпература, болі ў цягліцах і слабасць).

Праз тыдзень верагоднасць заражэння іншых зніжаецца, але ўсё ж застаецца на працягу 21 дня з моманту з'яўлення сімптомаў».

У прафесара спыталі, можа варта падаўжаць рэжым самаізаляцыі да 21 дня, а лекараў правяраць не раз на тыдзень, а кожных 5 дзён?

Касюлявічус адказаў: «Для самаізаляцыі, калі чалавек не захварэў, дастаткова 14 дзён, потым будзе нават досыць і 7 дзён, бо сярэдні інкубацыйны перыяд 5 дзён. Калі захворваеш, тады ты можаш быць крыніцай заражэння 21 дзень. Праверка кожныя 5 дзён лагічная».