Канфлікт на прадпрыемстве кіраўніка справамі Лукашэнкі выйшаў на новы ўзровень

Працаўнікі патрабуюць ад Віктара Шэймана разабрацца ў сітуацыі.

30 супрацоўнікаў калектыву ААТ "Гандлёва-лагістычны цэнтр Азярцо-лагістык" звярнуліся да кіраўніка Управы справамі Лукашэнкі Віктара Шэймана з адкрытым лістом. Арганізацыя знаходзіцца ў падпарадкаванні Кіраўніцтва справамі, піша praca-by.info.

Супрацоўнікі "Азярцо-лагістык" раней ужо звярталіся да кіраўніка Управы справамі пасля таго, як у жніўні 2019 года кіраўнік арганізацыі Сяргей Дабрыян беспадстаўна пазбавіў супрацоўнікаў надбавак за профмайстэрства, характар і спецыфіку працы, за складанасць і напружанасць у працы.

Працаўнікі не ведаюць і не разумеюць, за што здымаюцца даплаты, надбаўкі і прэміі, а за што даюцца. Яны мяркуюць "непрымальнай" сітуацыю, калі асноўная частка заробку складае ўсяго 50%, а астатнія выплаты яны могуць атрымаць толькі аднаасобнай пастановай кіраўніка.

Мала таго, у апошні час "з боку кіраўніцтва пачаліся ў сутнасці дыскрымінацыйныя і дэструкцыйныя дзеянні ў адносінах да працаўнікоў, якія актыўна адстойваюць нашы інтарэсы ў перамоўных працэсах паводле калдамовы. Гаворка ідзе пра Алену Вярбілу і Дар'ю Анішчык: абедзвюм цалкам беспадстаўна і незаконна абвешчаныя вымовы за тое, што яны праз пісьмовы дазвол сваіх непасрэдных кіраўнікоў адпрасіліся з працы на дзве гадзіны раней. Яны таксама пазбаўленыя прэмій, даплатаў i надбавак на цэлых 6 месяцаў".

"Усе гэтыя непрадуманыя дзеянні, што не паддаюцца здароваму сэнсу, дэстабілізуюць працу ў працоўным калектыве і выклікаюць абгрунтаваны недавер да кіраўніцтва арганізацыі", – гаворыцца ў лісце.

Супрацоўнікі ААТ "Азярцо-лагістык" патрабуюць прывесці ўсе палажэнні пра даплаты, надбаўкі ў адпаведнасць з патрабаваннямі працоўнага калектыву, а менавіта: увесці дадатковае пагадненне ў дзейныя кантракты, надбаўкі за профмайстэрства; за характар і спецыфіку працы; за складанасць і напружанасць працы.

Падпісанты патрабуюць вызначыць градацыю памеру прэмій пры частковым невыкананні плану. Але памер асноўнага заробку пры гэтым павінен складаць не цяперашнія 50%, а не менш за 70%.

Аўтары звароту патрабуюць "скасаваць незаконныя загады пра накладанне спагнанняў на Алену Вярбілу і Дар'ю Анішчык", а таксама перазаключыць кантракт з загадчыцай склада Аленай Вярбілай.

"Калі нашы патрабаванні будуць праігнараваныя, мы будзем вымушаныя звярнуцца з адкрытым лістом на імя Лукашэнкі, а таксама ўжыць усе вычарпальныя захады калектыўнага ўздзеяння для абароны сваіх законных інтарэсаў, аж да прыпынення працы", – гаворыцца ў звароце.