Спецслужбы ЗША папярэдзілі сенатараў пра новае ўмяшанне РФ у выбары

Масква, сярод іншага, спрабуе ўплываць на праймерыз дэмакратаў.

Спецслужбы ЗША мяркуюць, што Расея ў 2020 годзе ўмешваецца ў выбары прэзідэнта, каб спрыяць перавыбранню Дональда Трампа. Пра гэта паведамілі ў чацвер, 20 лютага, амерыканскія выданні The New York Times, The Washington Post і тэлеканал CNN, паведамляе dw.com. Паводле іх звестак, высокапастаўлены прадстаўнік спецслужбаў апавясціў пра гэта камітэт выведкі Палаты прадстаўнікоў Кангрэсу ЗША на канфідэнцыйным брыфінгу. Сярод іншага, спецслужбы мяркуюць, што Масква ўмешваецца ў першасныя выбары дэмакратаў.

Брыфінг адбыўся 13 лютага, а на наступны дзень Трамп выгаварыў выканаўцу абавязкаў дырэктара Нацыянальнай выведкі ЗША Джозэфу Магуайру за тое, што ён дазволіў правесці гэтае мерапрыемства, адзначаюць СМІ. Праз некалькі дзён кіраўнік Белага дому абвесціў, што амбасадар ЗША ў Нямеччыне Рычард Грэнэл зменіць Магуайра.

Між тым удзельніца прэзідэнцкай гонкі 2020 года, сенатарка-дэмакратка ад Масачусэтса Элізабэт Уорэн таксама заявіла, што "Расея зноў умешваецца ў нашы выбары з мэтай дапамагчы абранню дзейнага кіраўніка дзяржавы. Трамп ірве на шматкі вяршэнства закона і цэласнасць нашай дэмакратыі", – дадала Уорэн.

Расследаванне спецпракурора Мюлера

Праз некалькі месяцаў пасля абрання Дональда Трампа прэзідэнтам камісія пад кіраўніцтвам спецпракурора ЗША Роберта Мюлера пачала расследаваць меркаванае ўмяшанне Расеі ў выбары кіраўніка дзяржавы ў 2016 годзе. Даклад Мюлера быў апублікаваны пасля заканчэння расследавання вясной 2019 года.

Спецпракурор выявіў спробы прадстаўнікоў РФ умяшацца ў перадвыбарчую гонку, але не змог даказаць змову перадвыбарчага штаба Трампа з расейскімі ўладамі.